Assembly Speaker atan Lalbiakzama thlan a ni

Mizoram Legislative Assembly 9-na thutkhawm hmasa ber nimin-a neih ah Speaker atan Chalfilh bialtu MLA Lalbiakzama chu chuhtu awm lova thlantlin a ni.

Nimin-a Assembly thutkhawm neih ah hian Member thar te lakluhna neih a nih hnuah Protem Speaker kaihhruaina in Assembly Speaker thlanna neih zui nghal a ni a, Speaker thlanna neih ah hian Chalfilh bial atanga thlantlin Lalbiakzama chiah hming pelut a awm avangin chuhtu awm lovin tling-ah puan a ni a. Hemi hnu hian a thutna turah House Leader Lalduhoma leh Opposition Leader Lalchhandama Ralte ten a thutna ah an hruai a. A kaihhruaina hnuaiah Assembly Inkhawm neih chhunzawm nghal a ni bawk.

Assembly Speaker thar Lalbiakzama chuan House-ah lungrual taka ro an rel theih nan Member te theihtawp chhuah turin a chah a, rual khai taka rorel a tum dawn tih sawiin, Ruling leh Opposition te pawhin theihtawp chhuaha inthlawp tawn turin a ngen tih a sawi bawk.

Nimin-a thutkhawm neih zawh hnuah Speaker thar hian thuthar thehdarhtute kawm nghalin “He Chair ka luah chhung chuan fair leh in khairual (impartial) taka Dan hnuai a kalpui ka tum ang, neutral tak a kaihhruai ka tum ang,” a ti a. “Tunhma a kan ngaihdan mawl tak – zelthel leh awlsam tak a sum lakluh tumna te, felfai chiah lo a sum beiseina te, tangkai lo taka hun kan hman thin te, nun uluk lo taka kan hman thin te kha bo tawh sela,” tiin “Thlan tla in thahnemngaihna nen thawk ila, kan ei leh bar zawnna ah te tihtak zetin kan theihna zawng zawng pe ila, malsawm tlak a kan hun te kan hman chuan Lalpa a chuang tawh mai dawn a ni,” a ti bawk.

Hemi hnu hian Speaker thar hian Mizoram Legislative Assemby a Speaker hmasa ber Dr. H. Thansanga hnenah thurawn leh malsawm tawng-taina dawng turin a pan nghal a. Dr. H. Thansanga hi Durtlang Hospital-ah awmin Speaker thar hi a lo tawgtai sak a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni