Kum 5 chhungin Electric Bill tihsan a ni dawn lo tih P&E Minister in a sawi

Power & Electricity (P&E) changtu Minister F. Rodingliana chuan kum 5 chhungin Electric Bill tihsan a nih dawn loh thu a sawi.

Niminpiah tlai khan P&E Departmeng changtu Minister F. Rodingliana hian a Department chan-a Official te kawmin mipui-a an intiam ang ngeiin an term (kum 5) chhungin Electric Bill an tihsan dawn loh thu sawiin, hemi atan hian theihtawp chhuahpui turin Department a sawm a, “Theihtawpin inrenchemna kan kalpui dawn. Mipui pawhin duty an neih chu power inrenchem a ni. Kum 5 chhungin Power-a intodelh turin hma kan la dawn. Power policy ennawn a ni anga, kum khat chhunga zawh tum a ni,” a ti a. Mini Hydel Project ho chu tuna la Outsource loh pawh Outsource vek tum a nih thu sawiin, “Tlawng lui khuah kan duh a, Tuivai leh Tuichang pawh tun kum 5 chhunga hma lak zui tum a ni. Mipui tan kan inhlan a, Official-te pawhin min inhlan pui loh chuan kan hlawhchham dawn,” a ti a. “Mipui hnenah sum sem kan tiam ve loa, Sustainable Development kalpui kan tum ang bawkin, Sustainable Electric Current neih kan duh a, Sustainable mai ni loin Electric Current su nasa lutuk hi mipuiin an tuar a, chumi khuahkhirh dan ngaihtuah a tul, a ti bawk.

ZPM Party-in 'Hand Holding Policy' a ruahman chu Industry bikah he Policy hmang hian ram khaichhuah an tum tih sawiin F. Rodingliana chuan, “Ni 100 chhunga tihhlawhtlin tur zinga tel, Central Policy zir tur bik MSME Cell din a ni dawn. Sum sen belh ngai loin Staff awmsa pawhkhawm a ni ang. Industry hi kan ram sum hnar tur a ni,” a ti bawk. Commerce & Industries Minister ni bawk chuan Mizoram Preferential Store Purchase Rules 1994 a taka hman a hun tawh tih sawiin, kan rama siam leh thar priority-a dah tur a nih thu a sawi a. Kan rama awmsa Mau hmang tangkai turin Mini Paper Mill siam tum a nih thu leh hemi ah hian interest atan cheng vbc. 5-10 inkar vel dah a ni dawn tih a sawi a. Chhungkaw 12000 velin eizawnna atan an hmang thei dawna chhut a nih thu leh paper bakah pulping lam an ti tel dawn thu a sawi bawk.

Function mumal tawh lo District Industrial Centre tharthawh leh thuamchak nan State sawrkar sum a tum dawn thu Minister chuan sawiin, a neitu awm lo ang maii a Industrial Growth Centre ho awm chu tuaihnum a, Subsidy-a power pek theih nan Power Policy leh Industrial Policy ennawna cheithat a ni dawn tih a sawi a. “Kan policy hi Agriculture based industry deuh vek a ni a, thlai thar lei tur bikah a ching duhte tan Soft loan nuai 50 atanga 150 thleng an lak theihna tur Budget-a dah tum a ni a. Kum khat chhunga tihhlawhtlin kan tum,” a ti a. A Department chan pakhat, Printing & Stationery pawh dah len an tum thu leh chumi atan chuan zirchian a, chawikan a nih dawn thu a sawi bawk.