East Lungdar tharchhuah Serthlum vailiam a ni

Serchhip District chhung East Lungdar khuaa Serthlum chingtu intelkhawm Zotui Orange Producer Company Ltd. in Serthlum an tharchhuah te chu nimin atanga Aizawl-a ‘Orange Road Show’ a zawrhchhuah turin nimin zing khan Serchhip Addl. DC Lalnundika chuan Serchhip atangin a vailiam.
Serchhip Sailiamkawn-a heng Serthlum vailiamna puala inkhawm tawi neih ah Serchhip Addl. DC Lalnundika chuan East Lungdar khuaa Serthlum chingtute chu fakawm a tih thu leh an hmalakna chu entawntlak an nih thu sawiin, hetianga Serthlum an hralhchhuak leh chu midangte tan pawh chona a nih thu a sawi a. He an hmalakna hi Serchhip DC Office pawhin an tuipui thu leh sum leh pai te pawhin a theih anga an lo tanpui tawh bakah hma an lakna tur pakhat Citrus Fruit Juice Processing Unit dinna tur DPR an siam pawh bawhzui mek anih thu a sawi a. An hmalakna zelna turah tanpuina atan sumfai Rs. 10,000/- a hlan nghal bawk a ni.

Zotui Orange Producer Company Ltd. hi Central Sector Scheme, Formation and Promotion of 10,000 FPO hnuaiah August 31, 2021 khan din niin he Company hnuaiah hian kuthnathawk Serthlum chingtu mi 100 in share an nei mek a. Zotui Orange Company hian an share te tipung turin an CBBO, Clover Organic Pvt. Ltd. te nen tangho in nimin atanga tan turin Aizawl-ah ‘Orange Road Show’ hi an buatsaih a, heta zawrhchhuah tur hian Serthlum hi vailiam a ni a, tun tum hi a vawi khatna niin Serthlum pum 11000, quintal 15 vela rit chu thawnchhuah a ni a, he Road Show neih chhung hian Serthlum pum nuai khat vel hralhchhuah tum a ni bawk.

Nimin-a Serchhip Addl. DC in Serthlum a vailiamna hunah hian Serchhip District Agriculture Officer (DAO) Lalchharliana leh Serchhip District Horticulture Officer (DHO) R. Lalrintluanga te bakah Serchhip-a MJA Member thenkhat te an tel a ni.