Raltlan tana theihtawp chhuah chhunzawm turin ngen

MNF Party chuan Sawrkar hmasa in theih-tawp alo chhuahpui tawh angin kan unau raltlante tan theihtawp chhuah chhunzawm turin ZPM Sawrkar chu an ngenin an chah bawk.

Nimin-a thuchhuah an siamah MNF Party chuan an duh reng vang ni hauh lovin kan unau Myanmar, Bangladesh leh Manipura chengte chuan harsatna namen lo tawkin an chenna hmunah tihduhdah, nghaisak leh thah an tawk tih an sawi a. An nunna humhim turin Zofate Jerusalem, Mizoram an rawn pan tih sawiin, Myanmar leh Bangla-desh atanga rawn tlanlutte phei chu thawnlet turin India sawrkarin na takin Mizoram Sawrkar rawn nawr mahse kan unau, kan thisen zawmpuite chu 'dam leh tlang khatah, thih leh ruam khatah' tiin MNF kaihhruai sawrkar khan a lo hum tih an sawi a. Mipuite nen tangkawpin ei leh in, chenna leh thuamhnaw bakah zirna thlengin a pe a, an tan huaisen takin a ding tlang tih an sawi bawk.

MNF thuchhuah chuan Mizo hnam in a mawhphurhna tlansan lova a dingnghet tlat angin, kan unaute hi an chenna hmun ralmuang a nih a, zalen taka nun an hman leh theih hma chu thlamuang taka Mizoram-a an awmzui zelna turin Mizoram Sawrkar, ZPM kaihhruai chu ding chhunzawm zel tur leh nghei lova an mamawh angte pe chhunzawm zel turin an chah a. Zo Hnam inpumkhatna kawnga huaisen taka Pa chan changa a din chhunzawm zel an beisei tih an sawi bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni