Halpuah leh halmawi khap

Krismas leh Kumthar vuakvet lo thleng turah Serchhip District-ah Halpuah leh halmawi chi hrang hrangte khapna thupek tihchhuah a ni.
Serchhip District Magistrate David Lalthantluanga’n tun thla ni 6-a thupek tichhuaka a tarlan danin, Halpuah leh halmawite hian nasa takin mihring hriselna a tichhe theiin, boruak a tihchhiat leh tih bawlhhlawh mai bakah ri bengchheng a siam a, Silai lem a mu nei chite hian mihring piansualna a thlen tak fo bakah tul lova sum khawhralna a ni bawk a. Hei vang hian Serchhip District mipuiten hriselna tha tak kan lo neih theih nan leh sum leh pai tam tak kan khawhral loh nan heng hunpui kan neih - Krismas leh Kumthar hlim tlang tak leh thlamuang taka kan hman theih nan Section 144 CrPC, 1973 in thuneihna a pek angin Halpuah, halmawi, Sky lantern leh puakthei thil dang, boruak thalo siam thei leh ri bengchheng siam thei chi reng reng leh Naupang silai lem a mu hmang chi reng reng lakluh, zawrh leh hralh khap tlat a ni. He thupek hi chhuah a nih atanga thla hnih huam tur niin a zawm lo te chu Section 188 IPC hnuaia Dan hmanga hrem an ni ang.