ZPM kaihhruai Mizoram sawrkar thar lakluh a ni

ZPM Leader Lalduhoma kaih-hruai Mizoram sawrkar thar chu nimin khan lakluh a ni ta a, Chief Minister atan Lalduhoma bakah Cabinet Minister 7 leh Minister of State 4 lakluh niin Protem Speaker atan Lalfamkima chu lakluh a ni bawk.

Nimin-a sawrkar lakluhna inkhawm hi Raj Bhavan tual-ah neih ah Governor, Dr Hari Babu Kambhampati chuan ram Danpui hnuaia rinawm taka hnathawk tur leh sawrkar thurûk vawng tha tura thu tiam tirin Minister te leh Protem Speaker hi a lalut a. Cabinet Minister atana lakluh te hi K. Sapdanga, Vanlalhlana, C. Lalsawi-vunga, Lalthansanga, Dr. Vanlalthlana, PC. Vanlalruata leh Lalrinpuii te an ni a, Minister of State (Independent Charge) atana lakluhte chu F. Rodingliana, B. Lalchhanzova, Prof. Lalnilawma leh Lalnghinglova Hmar te an ni.

Cabinet Minister atana lakluh zingah Dr. Vanlalthlana, C. Lalsawi-vunga, Lalthansanga leh Vanlalhlana te hi MLA lo ni tawh niin  K. Sapdanga leh  Lalrinpuii-te erawh MLA an nih vawikhatna niin Minister of State atana ruat thar te pawh MLA an nih vawi khatna vek a ni. 

Sawrkar thar lak luhna inkhawm hi Chief Secretary Dr. Renu Sharma chuan a kaihruai a, Chief Minister kal chhuak ta Zoramthanga leh Chief Minister hlui Lal Thanhawla bakah MLA thlan tharte leh sawrkar mi pawimawh te an tel a. Minister te hna chanpual tur pawh siam nghal a ni.