Vietnam mi TNT-ah dah ta

Kum 2020 kum-a East Lungdar VLTF ten an man Vietnam mi pakhat chu hun rei tak Ser-chhip District Jail-a enkawl a nih hnuah nimin khan Centre for Environment and Social Justice (CESJ) te chuan lachhuakin Thutak Nunpuitu Team (TNT) Camp, Zuangtui-ah dah a ni ang.
Kum 25-a upa nia hriat Dahn (Niang) hi kum 2020-a man a nih hnuah hian Serchhip District Jail-ah April 24, 2020 khan dahluh a ni a, Foreigner Act hnuaiah thubuai siam sak niin kum hnih (2) chhung tang tur leh Rs. 10,000/- chawi tura hrem a ni a. A tan hun tura bituk hi a tan zawh hnuah pawisa chawi tur a neih loh avanga thla hnih chhung tang tura tih pawh tang lehin June 23, 2022 khan a chhuak thei tawh a, amaherawh chu pan tur a neih loh avangin Serchhip District Jail-ah hian enkawl a ni zui ta zel a ni.

Dahn hi rilru lama rual ban chiah lo niin man a nih tirh hian khawi lam mi nge tih pawh hriat a ni lo a. A chin hriat tum hian South East Asia ram hrang hranga Mizo Missionary te biak niin hemi hnu hian Vietnam lam mi a ni tih hriat a ni ta a. Ser-chhip DC chuan vawi engemaw zat thuneitute hnenah hriattirin Mizoram Home Department-in Ministry of External Affairs an hriattir hnuah Vietnam Embassy chuan Dhan hi an ram mi leh sa ngei a ni tih chhui chhuakin Vietnam thingtlang khuaa cheng a ni a. Vietnam passport pawh siam sakin Embassy lamin an lak theih hunah an ram lamah a haw thei tura tih a ni.

Dahn-a buaipui hian Civil Society atangin Human Rights and Law Network Mizoram te pawhin MEA lamte an bepawp a, Jail tan hun hmanga zo tawh awmna neih loh vanga Jail-a awm reng chu Mizoram Kristian rama rorelna dik lo leh tha lo (injustice) a nih theih avangin Centre for Environment and Social Justice (CESJ) chuan a awmna tur an dap sak a, mimal inhawng te awm mah se TNT-ah hian dah a ni ta zawk a, Social Activist Vanramchhuangi (Ruatfela nu) chu Legal Guardian a ni zui dawn a ni.