An intiam angin thlai thar chi 4 an lei dawn tih Chief Minister Lalduhoma’n a puang

Mizoram Chief Minister thar Lalduhoma chuan nimin-a a kaihhruai sawrkar thar lakluh a nih hnuah thuthar thehdarhtute kawmin Mizoram Sawrkar sum dinhmun a that loh avangin Sawrkar kum thar lo thleng tur chu insawhngheh kumah an hmang dawn tih sawiin, an intiam angin thlai thar chi 4 an lei nghal dawn tih a sawi.

Raj Bhavan Durbar Hall-a thuthar thehdarhtute a kawmna ah hian Chief Minister Lalduhoma chuan a kaihhruai Sawrkar-in ni za chhunga hma a lakna tur a puang a. Finance Department-a SEDP atan cheng vbc. 150 dah chu thu leh awm hma atan khawih chet loh tur a nih thu a sawi a, Minister ten an Department an enkawl dan tur ruahman sa hmanga an kal dawn avangin Budget siam chungchangah Department chu Minister te thu ngaichang thiam turin a chah a, Budget thar chu ZPM Policy hawi-a duan tur niin, tunhmaa an lo tih dan thin ni lo, ZPM Policy tihhlawhtlinna lam hawi zawnga Budget kalpui a nih theih nan Department tin chu hmala turin a chah a, Budget-a chhiarkawp dik lo a nasa thin lutuk pawh tun aia a ziaawm theih nan hmalak a nih tur thu a sawi a, Sorkar sum mahni mimal Account-a lo la dah an awm a nih chuan hremna lekkawh ngai lo a, mahni lo inchingfel nghal turin a chah bawk.

Lalduhoma chuan, sum dinhmun siamtha turin Resource Mobilization Committee an din dawn tih sawiin, he Committee hnuaiah hian inremchenna kalpui tur niin, chutah chuan Minister ten hma an hruai ang a, Chief Minister-in 4th Grade 8 a kawl theih chu 4-ah tihniam nghal a ni ang a, Minister ten 4 an kawl theih chu 2-ah, MLA ten 2 an kawl theih chu 1-ah tihhniam a ni dawn a. MLA zawng zawng tan Car thar lei tihtawp a ni dawn a, Minister ten motor thar an lei dawn lo a, Minister pakhat zelin Car 1 leh Spare Car 1 bak an kawl dawn lo a, Bangla te pawh cheitha kher loin a awm ang anga chhawm a ni dawn a, Sawrkar Building zawng zawnga Furniture te pawh thlak a tul hunah chuan Mizo siam vek-a thlak thin a ni dawn tih a sawi a. Minister te an zinin an inzui duah duah tur a ni lo tih sawiin, Sikul naupang inhmuh tir te tih loh tur a ni a, inzawn phei chu khap a ni tih a sawi a. Minister te chu khuallian-ah pawh tan chhen an tum lo a, hei hi mipuite pawhin hriatpui se an duh tih sawiin, inrenchemna an kalpui turah Sawrkar hnathawkte chu an hmalakna tha taka thlawp turin a ngen nghal bawk.

Sawrkar hnathawk aikal la leh mahni post a awm lote chu an nihphung chiang takin January thla ralhmaa sawrkar-ah hriattir vek turin Chief Minister chuan a chah a, Sawkar hmasa in Contract a pek, hna to tan tawhte chu an hna an tihtawp sak dawn lo tih sawiin, an hna erawh a tha tur a ni, a ti a. Restricted Tender reng reng Chief Minister pawmpuina la hmasa lo kalpui a rem dawn lo tih a sawi bawk.

Chief Minister chuan, eirukna dona kawnga hma an lakna turah Lokayukta chu thuamchak an duh a, tuna a dinhmun chu thuamchak chi a ni nge ni lo tih endik phawt a ni dawn tih pawh sawiin, CBI pawh Mizoram-a hmalak phalna a rang thei ang berin an pe dawn tih a sawi.

Mizoram a Project zawng zawng endik turin Monitoring Committee an din dawn a, chutah chuan pawl hrang hrang aiawh an awm dawn tih pawh sawiin, Contractor a huna hna zo lote chu endik zel a ni dawn a, Committee in phalna a pe a nih loh chuan an hun pawhsei sak emaw, sum pek belh emaw a ni dawn lo a. Hemi kawnga an hmalakna ah hian Sawrkar hnathawk leh mipui tawiawmna an mamawh dawn hle tih a sawi. Hun hman dik kawngah pawh chak taka hmalak a ni dawn tih sawiin, Department hrang hrangte chu Bio-metric attendance lo buatsaih nghal turin a chah a. State Marketing Board din tur niin, thlai thar lei leh hralh ....kawngah hma an la ang a, Boundary Committee pawh din nghal a ni dawn a, Mizoram Subbordinate Services Selection Board leh SEDP Board te chu thiah nghal a ni dawn a, Resouce Mobilization Department pawh thiah nghal tur niin, Committee anga kalpui a ni dawn a. Right To Public Service Act Pass tawh chu a taka hmang nghal turin department tin te chahin, ruihhlo do kawngah a taka hmalak tur niin, Budget-ah pawh sum tam zawk dah a nih tur thu a sawi.

Chief Minister chuan, ZPM kaihhruai Sawrkar thar chuan an bultan nan Lal Isua thusawi ‘Kal la tisual leh tawh suh’ tih chu an rilru-ah an vawng reng tih sawiin, tunhmaa thil lo kal tawh han chhuilet leh lam chu an rilru-ah a awm lo a, tun atang erawh chuan mi tinin dik takin thil an ti tur a ni a, diknaa rorel a intan tawh hnua tihsual leh te erawh chungah chuan khauh takin hma an la dawn tih a sawi a. “Miin FIR thehluh theihna zalenna an nei a, Court-a thu kalah chuan Sawrkar-in inrawlh theihna a nei lo a, thubuai kal lai emaw, thubuai thar emaw a awm a nih chuan ama kawng pangngai a zawh mai tur a ni,” a ti.

Mizoram-ah thu dik tawk lo hmanga inpuhna a nasa a, a bikin inthlan dawnah thu dik lo thehdarh a tam avangin Politics hmel a tibal nasa a, a bikin Fake Account hmanga thu dik lo thehdarh thinte chu chhuichhuah zel an ni dawn tih a sawi a. Sawrkar hnathawkte pawhin zalenna an neih chu tha taka ram leh hnam tan hmang se an duh tih a sawi bawk.

Heng bakah hian Minister tin Office-ah thurawn thehluhna leh lungawi lohna thlenna tur bawm an hung dawn a, chutah chuan mi tinin rawtna an neih leh sawisel duh an neihte chu thehluh theih a ni dawn a, chu chu ngun takin an lo zir thin dawn a, hei hi Online hmanga tih theih tura ruahman a nih tur thu a sawi a. Heng thil hrang hrangte hi Department zawng zawngin lo chhinchhiah a, bawh-zui nghal tura a duh thu a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man