Thenzawl-ah Apex Bank Branch thar hawn a ni
Vantawng Group YMA Run-a MCAB Branch thar leh ATM thar hawnna hun hi MCAB Vice Chairman Lalrinchhana chuan kaihruaiin MCAB Chairman Lalnunsanga chuan Branch thar leh ATM te hi a hawng a. Thenzawl a Apex Bank Branch thar leh ATM thar hawn a ni chu lawmawm a tih thu sawiin, Apex Bank chu Mizo te Bank bik, Sawrkar leh mipui ten Mizo kan nih anga kan ngaihhluta, kan dawr hram hram tul a tih thu a sawiin, a neitu Mizote kan nih avangin ramin buaina pawh tawk se, a hlu telh telh dawn a ni, a ti a, Kumthar ah Mizoram khaw lian deuh dangah pawh Apex Bank Branch thar din tuma hmalak zel anih thu a sawi bawk
Nimin-a Bank thar hawnna hunah hian MCAB Thenzawl Branch Manager thar Lalsiamthara chuan Technical Report pein Thenzawl Joint VC Chairman R. Lalramnghaka leh MCAB Chief Executive Officer Lalzuahliana te pawhin thu an sawi a. Apex Bank chu mipui ten a thatna leh mipui ta a nihna te zirchianga, tangkai taka Thenzawl leh a chhehvel mipui ten an hman ngei an beisei thu an sawi a ni.
Nimin-a hawn thar tak Mizoram Cooperative Apex Bank (MCAB), Thenzawl Branch hi Mizorama Cooperative Apex Banch 27-na niin, Serchhip District-a Apex Bank pahnihna niin hemi hmalam hian Serchhip-ah hawn a lo ni tawh a, ATM hawn tak hi Mizorama Apex Bank ATM 31-na a ni bawk. Thenzawl Bazar Veng a V. Thasiama building-ah Office hawngin, Branch Manager hovin thawktu pathum (3) dah nghal an ni a, heti hian Thenzawl-ah Bank pathum -Mizoram Rural Bank (MRB), State Bank of India (SBI) leh Mizoram Cooperative Apex Bank (MCAB) te awmin, ATM Booth pahnih a awm ta bawk a ni.
Comments
Post a Comment