Serchhip District-ah kum chhungin rannung seh leh Typhoid kai hmuhchhuah an tam hle

Kumin January atanga November thla tawp thleng khan Serchhip District-ah rannung seh (Scrub Typhus) kai mi 1105 zet hmuh an ni a, hei bakah hian Typhoid kai mi 1170 hmuh ni bawkin kumin chhung hian Serchhip District-ah COVID-19 hri kai mi 15 hmuh an ni bawk.
Serchhip CMO Office atanga thu kan dawn danin kumin January atanga November thla tawp thleng khan Serchhip District-ah mi 5888 te chu Typhoid an kai leh kai loh enfiah niin heng zingah hian Typhoid kai mi 1170 hmuh an ni a, Sample enfiah atanga za zela 19.87 te chuan Typhoid an kai a, natna mal khai-a hri kai hmuh tam berna a ni a. Hei bakah hian kumin-a thla 11 chhung hian mi 5772 te Sample enfiah atangin Rannung Seh (Scrub Typhus) 1105 hmuhchhuah an ni bawk a, Sample enfiah atanga za zela 19.14 te chu Rannung Seh an ni bawk.

Kumin-a thla 11 chhung hian Serchhip District-ah Dengue kai mi 62 hmuh an ni bawk a, Malaria kai leh kai loh mi 3868 enfiah atangin Malaria hri kai mi 45 hmuh an ni bawk a, heng bakah hian kumin chhung hian CO-VID-19 kai leh kai loh mi 36 enfiah atangin COVID-19 kai mi 15 hmuh an ni bawk a, kumin chhunga Serchhip District-a COVID-19 kai hmuhchhuah te hi May thla leh July thla a hri kai hmuh te an ni a. A hnu lamah Sample enfiah leh COVID-19 kai hmuh an awm lo a ni.