Synod Inkhawmpui-ah Inkhawm tihtlem tlang lo

Presbyterian Kohhran rorelna sang ber Synod Inkhawmpui-ah Kohhran Inkhawm tihtlem rawtna lut chu a tlang ta lo.

Synod Inkhawmpui vawi 100-na chu nimin Pathianni hmang khan Aizawl Mission Veng Pastor Bial-in Mission Veng Kohhran Biak In Pui-ah thlengin kar kalta Thawhlehni, Dec. 5, 2023 atang khan neih a ni a. Synod Inkhawmpui tan ni, kar kalta Thawhlehni khan Nomination Committee an thu a, Nilaini atanga Inrinni thlengin Rorel a ni a, Synod Moderator Rev R. Vanlalnghaka chuan kaihruaiin General Agenda 37 leh Executive Committee bakah Board atanga thu lut 15 leh Budget, Report te, Kohhran inrelbawlna pawimawh tak takte an rel a ni.

Synod Inkhawmpui tun tum Rorel langsar zingah, kum kaltaa Synod inkhawmpui rorelin Synod Executive Committee ngaihtuah zui tura a lo pawm tawh, Mizoram Presbyterian Kohhran Inkhawm tih tlem chungchang chu ngaihtuah a nih hnuah Inkhawm tihtlem chu a tlang zo ta lo a, a ngai anga Inkhawm kalpui chhunzawm tura tih a ni a. Hei bakah hian chhungkaw kehchhia an pun zel loh nan hmalak rawtna chu Synod Executive Committee bawhzui turin an dah a, Anpui inkawp a bo theihna tura rawtna chu Synod hmalak mekna a ni a, Kohhran tinah hmalak chhunzawm zel ni rawh se tiin an rel bawk a. Fa lak chungchang inzirtirna rawtna pawh SEC bawhzui turin an dah a, hei bakah hian Contract hna hralh a awm lohna tura hmalak rawtna pawh SEC bawhzui turin an dah bawk. 

Nimin Chawhma Inkhawmah Pastor nemngheh leh Pro. Pastor dahngheh inkhawm buatsaih a ni a, Moderator Rev. R. Vanlalnghaka'n Pastor atan mi 18 a nemngheh bakah Pro-Pastor atan mi 18 a dahnghet a. Chawhma Inkhawm-ah hian Rawngbawltu mi 8 pension thlahna Certificate hlan niin Chawhnu Inkhawmah Moderator in Lalpa Zanriah Sacrament a theh a, Pastor 2 sunna hun hman a ni bawk.

Tun tum Synod Inkhawmpui hi a vawi 100-na a nih avangin a thlengtu Mission Veng Pastor bial inpuah-chahna a nasa a. Kum bul atangin khawmpui thleng tur Committee peng hrang hrang siamin, an chanvo leh nihna pawh Mizo takin dah leh ruat vek an ni a. Ushering chu ‘Viltu’ tiin, Information & Publicity pawh ‘Tlangau’ leh Refreshment pawh - ‘Ei leh In’ tiin an inphuah a ni. Palai te tana a awlsam na’n TV hmun hrang hrangah hun a nih bakah internet web hmanga Mizoram Presbyterian Kohhran hrang hrang chanchin, Puipate hming, Nihna leh Kohhran enkawltu Pastor te, KIOS ah hian hmehchhuah zung zung theih turin a vawikhatna atan Tlangau lam hian an hung chhuak bawk a ni.

Kumin Synod Inkhawmpui vawi 100-na hian palai 2128 kalin chhimtu zingah Wales ram atangin Pu Zolawma te pafa leh Rev. Sangkhuma Cardiff, Wales atangin an rawn tel thei a ni.