Mizoram Assembly 9-na thutkhawm hmasa ber neiin MLA hlawh tihpun a ni dawn lo tih CM in a sawi

Mizoram Chief Minister Lalduhoma’n sawrkar sum dinhmun a chhiat avangin inren taka kal a ngai dawn tih sawiin, hlawh tihpun a ni dawnlo tih a sawi a. Bial chhunga Department hmalakna tunhmaa MLA ten an hmuh ngai loh chu sawrkar tharah chuan MLA te hnen a thleng vek dawn tih a sawi bawk.

Nimin-a Mizoram Legislative Assembly 9-na thutkhawm hmasa ber neih ah House Leader, Chief Minister Lalduhoma chuan sawrkar sum dinhmun a chhiat avangin inren taka sawrkar a kal a ngai dawn tih sawiin, Term hmasa lama Member ten hamthatna an lo hmuh thin eng eng emaw chu hman zui a nih tawh dawn loh thu a sawi a. “Hlawh pawh tihpun a ni dawn lo a, hruaitute kan nih angin mipui hmaah hma kan hruai a ngai dawn a ni,” a ti a. House Member te chu inelna thianghlim nei tura chahin, “Mahni Bial theuh enkawlna kawngah inelna thianghlim nei sela, Ruling leh Opposition thliar hrang lovin he sawrkar hian Bial tin te kairual taka hmasawnna kawnga ke an pen theihna turin theihtawp kan chhuahpui theuh dawn a ni,” a ti a. Tunhma lamin an Bial chhunga Department hrang hrangin hma an lakna te a Copy MLA ten an hmu ve ngai lo tih pawh Chief Minister chuan sawiin, “Dap chawp a ngai thin a, zawn chawp a ngai thin a. Tun atang chuan Bial tina Department tin ten hma an lakna Copy hi kan Member zawng zawngte pek thin a ni tawh dawn a ni,” a ti bawk.

House Leader Lalduhoma chuan House Member an nih chuan Zirlai Exam tur ang deuh maia tan an lak reng a ngai tih pawh sawiin, taimak leh thawhrim a pawimawh thu a sawi a, “Thil thar kan la tawn ngai loh hriat thar tur, zir tur kan ngah em em,” tiin Parliament in Orientation Course an buatsaih ah zir tur tam tak a awm thu leh a kal tawh te pawh kal leh zel tha a tih thu a sawi bawk a. Term 3 chhung Opposition Group Leader a ni tawh tih sawiin, Lal Thanhawla leh Zoramthanga te a hrawn laia an tihdan phung tha tak chu Speaker thar kaihhruaina hnuaiah tha taka chhawmnun zel ni se, a ti a, Speaker thu awih theih te, tawngkam hawihhawm leh Mizo Kristian nihna tih lanna pawimawh tak ni thei se a duh tih a sawi a. Assembly House chhunga ‘Member zahawm tak’ in tih leh ‘Sir’ in tih chu tih tam vak loh ni se tih pawh Chief Minister chuan sawiin, ‘Chief Minister zarah’ tia House chhunga Chief Minister in fak siak vak vak te chu uar ve loh tur a nih thu a sawi bawk.

Nimin-a thutkhawm ah hian Opposition Leader leh Tuivawl bialtu MLA Lalchhandama Ralte chuan lungrual taka House bul an tan thei chu lawmawm atih thu a sawi a, Speaker atan Senior zing atangin tawnhriat nei tha an lo beisei laiin sum tamna lam an zawng chu corruption awm lohna sawrkar tiamtu te tih-a mawilo a ni tih sawiin, Speaker thar chu tawnhriat neilo mahse an thlawp tlat dawn tih a sawi bawk. 

BJP Legislature Party atangin Siaha bialtu MLA Dr. K. Beichhua chuan tun sawrkar ah mipuiin beiseina sang tak an nei tih sawiin, Speaker chu tawnhriat la neilo mahse beiseina sang tak an neih thu leh rualkhai taka House a kaihhruai a beisei tih a sawi bawk.

Congress Legislature Party atangin Lawngtlai West bialtu MLA C. Ngunlianchunga chuan Speaker in House-ah Member zalenna tha tak a pek an beisei tih sawiin, Ruling leh Opposition te pawh rualkhai taka enkawl turin a chah a, sawrkar chu tluang taka hmang zo turin duhsakna a hlan tih a sawi.

C. Ngunlianchunga chuan Congress aiawhin amah chauha thlantlin ni mahse Recess Room a hrana pek a phut thu a sawi bawk a, Midang Room tawm ve mai tura awm chu a duh dawnlo tih sawiin, Speaker chuan Room hran pe ngei se a duh thu a sawi a, Sawrkar thar chu enchhin tur annih angin theihtawp chhuah turin a duh tih a sawi bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni