Ministry thar-a Council of Ministers thutkhawm hmasa ber Chief Minister hova neih a ni

Mizoram State Legislative Assembly 9-na a Council of Ministers thutkhawm hmasa ber chu niminpiah khan Assembly Recess Room-ah Chief Minister Lalduhoma kaihhruaiin neih a ni.

Council of Minister thukhawm hian Sawrkarin ni 100 chhunga tihtur (100 days programme) a duante a thawktu Department te hnathawh dan viltu tur Monitoring Committee siamin, GAD chu Nodal Department-ah ruat an ni a. Sawrkar kumthar (2024-25) budget-ah thlai thar leina turin cheng vbc. 150 dahin Hand holding (Bana kaih) Policy atan Finance-ah budget dah tura rel a ni a. The Mizoram Right to Public Services Act, 2015 chu awmze neia kalpui turin Department tinte hmalakna nei nghal tura tih an ni a, Dan lova Kuvaro phurh kual velna titawp turin a tulna apiangah hmalak nghal tura tih a nih bakah Model Code of Conduct (MCC) nun hmaa Work Order tihchhuah tawh leh hnathawhna tur hmuna hna lo thawh tan tawh te chu an hnathawh lai chhunzawm phal sak an ni a. MCC nun tawh hnua hnathawh tante erawh chu Stay niin Work Order nei lo leh awm hmasa lova hna lo thawk tan te pawh stay an ni bawk.

SEDP Teacher te chu tun sawrkar kum kal mek (upto 31st March, 2024) thleng thawh chhunzawm tir remti in SEDP hnuaia Non-Teaching Staff te chu an hna tihtawp sak nghal an ni a. Fertilizers dealers, an license dik lo taka hmangtute license titawp sak tura hmalak an rel bawk. Resource Mobilization Department chu thiah/tihtawp (abolished) niin Department zawng zawng te chu sawrkar laipui kaltlanga hna an thawh mekte a pending issues, projects and proposals an neih zawng zawng te sawifiahna lehkha (write up) December ni 19 hmaa Planning & Programme Implementation Department a thehlut vek tura tih an ni a. Sawrkar pisa-a zu leh ruihhlo lam chi reng reng tih (consume) khap bur niin Sawrkar pisa te hi venhimna mumal tak siam a, fai taka enkawl tur leh CCTV te hman theiha awmtir tur a ni bawk a. Biometric Attendance System chu Department tinah hman tur niin Secretariat-ah a bul tan tur a ni a. Department hrang hrang ten Solar Panels an hman mek te chu tangkai lehzuala hman a nih theih nan P&E Department in a vil dawn a, Sawrkar hnathawkte mimal hna thawhtir (misuse of Govt. Servant) khap niin Lengpui Airport chu Airport Authority of India hnena hlan turin hma lak a ni ang a. Chutiang bawkin Zoram Medical College (ZMC) pawh central sawrkar kuta hlan tura hmalak a ni ang.