Lui-a bawlhhlawh lut thianfai turin Contractor hriattir

Mizoram Pollution Control Board (MPCB) chuan Tuirini lui nasa taka an tih bawlhhlawh avangin NHIDCL hnuaia Contractor pakhat chu an tih bawlhhlawh te thianfai turin an hriattir.

Mizoram Pollution Control Board chuan Thingsulthliah rama Tuirini Lui-ah tûnhnai ruahsûr lai khan bawlhhlawh nasa takin a luanglût tih hriat a ni tih sawiin, Whatsapp lama thlalâk lo hmutute pawh a tibuai hle tih hriat nih thu an sawi a. He thu hi an hriat velah a hmunah kalin an chhui nghal tih sawiin, NHIDCL hnuaia Contractor pakhat GVV (P) Limited-te Hot Mix Plant atanga bawlhhlawh chhuak vâng a ni tih hmuhchhuah a nih thu leh Hot Mix Plant atanga bawlhhlawh luang thlâ chu a bul-a luitê-ah a luang lût a, chu luitê chuan a thlangah Tuirini Lui a fin avângin Tuirini lui hi a tibawlhhlawh ta a ni tih an hmuh thu an sawi a ni.

Heng avang hian tun thla ni 7 khan Mizoram Pollution Control Board chuan GVV (P) Limited hotute chu an Hot Mix Plant titâwp nghal tur leh a rang thei ang bera tui an tih bawlhhlawh chu thianfai nghal turin a hriattir a, an hmalâknate kâr khat chhûngin Mizoram Pollution Control Board-a thehlût turin an hriattir bawk. Tarlan tawh angin he thil thleng chugchangah hian MPCB-a complaint thehluh a nih bakah Police te hnenah pawh FIR thehluh a ni tawh bawk a ni.