MNF insiamtha vek dawn

MNF President Zoramthanga chuan kumthar ah an insiamtha vek dawn tih sawiin, “Tun inthlan result hi kan thatna tur zawka Pathian remruat a ni tih kan pawm a ni,” a ti.

Mizo Hnam Run-a Chhung Inkhawm nimin-a neih ah MNF President leh Chief Minister hlui Zoramthanga chuan MNF chu kum thar-ah an insiamtha vek dawn tih sawiin, “A siam that ngai zawng zawng kan siam tha ang. Rawtna zawng zawng pawh kan ngaithla vek ang,” a ti a. Mizoram Legislative Assembly inthlanna ah Zoram hmun hrang hranga Party Worker te leh mipuite support-naah lawmthu sawiin, “MNF Party atangin MLA 10 lai Pathian in min pe hi a lawmawm hle a, hlawhtling lo zawkah tang mah ila tun inthlan result hi kan thatna tur zawka Pathian remruat a ni tih kan pawm a ni,” a ti bawk.

MNF President chuan Zoram hmun hrang hranga Party worker-te chu zam mai lo tur leh rilru thar nen tan lak theuh a pawimawh thu a sawi a, “Chak zawkin hei aia tha hian kan kal anga, kan tho kang leh ngei dawn a ni,” a ti a. “Kan sawrkar loh avangin kan zavaiin kan na tih ka hria a, theitawp kan chhuah veknaah erawh lawmthu ka sawi a ni. Pathian remruat hi dan zawh rual a ni lo a, ZPM sawrkar turin Pathian in rem a ruat a ni tih pawm thiam ila, Pathian in Zoram hi han enchhin ve reng reng a duh a ni,” a ti bawk.

He hunah hian MNF Legislature Party Leader Lalchhandama Ralte pawhin an thawhpui hlawhtlinna chang zo ve lo te an tuarpui hle tih sawiin, “Pathian zarah kan dam ang a, kan tho kang leh ngei dawn a ni. Kan ram hi Rorelna pakhat hnuaiah MNF hi kan ding chhuak leh ngei dawn a ni,” a ti a. 9th Mizoram Legislative Assambly a Zoram kal leh zelna an relna turah Zoram mipuite leh an hotute support-na an mamawh dawn tih sawiin, theihtawpa thurawn pek an mamawh thu a sawi bawk.