Vanlalfela N. Vanlaiphai khua hnenah ‘Millionaire Farmer of India Award 2023’ hlan a ni

Nimin khan New Delhi-ah ‘Millionaire Farmer of India Award 2023’ sem niin Mizoram atangin District pali (4)-a kuthnathawktu ten he chawimawina hi an dawng a, an zingah hian Serchhip District atangin Vanlalfela N. Vanlaiphai khua chu a tel a ni.
‘Millionaire Farmer of India Award 2023’ dawngtute hi Mizoram-a KVK ten an rawt anga chhawpchhuah niin Millionaire Farmer of India tih Title (nihna) pek an ni a, Mizoram atang hian Serchhip District chhung North Vanlaiphai khuaa Vanlalfela bakah hian M. Hrangmawia, Siata, Siaha District; KB. Sangkhuma, Rabung, Khawzawl District leh VL. Remruatpuia, Darlak, Mamit District te chuan he Award hi an dawng a, Award semna hun hi PUSA Mela Ground, New Delhi-ah neih a ni.

Serchhip District atanga he Aaward dawngtu Vanlalfela hi Mizoram-ah chuan Sunhlu tui zawrhchhuah theih tura siamchhuak hmasa ber zinga mi a ni a. Kum 2011 atang khan Sunhlu tui sawrin Enterprise a din tan a. Sunhlu Candy, Sunhlu Powder, Sunhlu den leh Sunhlu Oil te siamchhuak in eizawn nan a hmang mek a. Kum 2016 khan Horticulture Department hnuaiah Best Entrepreneur Award lain, tunah hian Sunhlu huan a siam mek a, Sunhlu sawngbawl bakah Essential Oil siam lamah hma a la leh mek a ni. Chhungkaw harsa ve tak atanga bultan niin tunah chuan an eizawnna Enterprise hlut zawng hi cheng nuai engemaw zat hu a ni tawh a, kum khat chhungin chhungkua 30 chuangin a bultan avanga hlawhtlinna hmuin a hnungzuiin an chhawr mek a ni. Hei bakah hian Angels Business Promoter, Aizawl te nen Farmers Producer Organization dinin Chairman hna a chelh mek a. A thil siamchhuah, Sunhlu Candy hi State pawnah thawnchhuah tura hmalak mek niin, Trilukya Dutta, Guwahati Based innovator te nen inbiakna a kal mek a ni.

Khawzawl District atanga he Award dawngtu KB.Sangkhuma hian Sawhthing, Fu leh Silk Pangang khawiah te hma lain, kum 2023 hian Sawhthing quintal 70 chingin a tlem berah quintal 400-500 a thar beisei a ni a; heng a hmalakna atang hian he Award hi a dawng a. Siaha District atanga dawngtu M. Hrangmawia hian Sial, Bawng, Vawk, Kel, Beram leh Ar vulhin hma a la a, tunah hian Sial hi a no nen 250 vel neiin, Sangha dil lian tak tak 5 atanga Sangha tam tak tharchhuah leh a ranvulh dangte avangin he Award hi a dawng a. Mamit District atanga dawngtu VL. Remruatpuia hian zirna a MBA a zawh hnuin Bawng vulh leh Sangha Dil-ah te hma lain a tharchhuah te atangin he Award hi a dawng bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar