Central YMA in mipuite hnenah ngenna an siam

Central YMA chuan Krismas leh kumthar lo thleng tur hlim leh lawm taka kan hman theih nan mipuite leh YMA Branch tin te chu theihtawpa tan la tlang turin an ngen.

Krismas leh kumthar lo thleng tur denchhena Central YMA thuchhuah siam chuan kan hmalawkah Kristiante hunpui Krismas leh kumthar kan lo thleng leh dawn ta tih tarlangin, “He hunpui hi Kristian ten hlim leh lawm taka kan hman theih nan, mipuite leh YMA Branch tinten theihtawpa tan la tlang turin kan inngen a ni,” an ti a. Nu leh pa ten Krismas puala an fate infiamna hmanrua an lei sak thinah silai lem (a mu kapchhuak thei)-te chu mi ti na thei a nih avangin lei sak lo tur leh sumdawngte pawh zuar lo turin an ngen a. Krismas leh kumthar lawmna atana kan hman thin, halpuah leh halmawi chi hrang hrangte chu mihring hriselna tana hlauhawm leh mi ti na thei a ni tih tarlangin, tul lova sum tam tak senna a nih bawk avangin lei lo tur leh zuar lo turin mipuite an ngen a. Heng hunpui-ah hian Zu leh ruihhlo chi hrang hrang a hluar thin avangin mitin te theihtawp chhuaha do tlang turin an ngen bawk a ni.