North Vanlaiphai khuaa cheng Thuampuii hnenah ‘Billionaire Farmer of India Award, 2023’ hlan

/

Serchhip District chhung North Vanlaiphai khuaa cheng Thuampuii hnenah nimin khan ‘Billionaire Farmer of India Award, 2023’ hlan a ni a, he chawimawina hi Mizoram pumah mi pakhat hlan niin hemi hmalam niminpiah khan Mizoram atangin mi pali te hnenah ‘Millionaire Farmer of India Award 2023’ hlan a lo ni tawh bawk a ni.
 Krishi Jagran buatsaih Billionaire Farmer of India Award hlanna hi nimin khan PUSA Mela Ground, New Delhi-ah neih a ni a, he chawimawina hi Mizoram atangin Thuampuii, North Vanlaiphai hian a dawng a. Thuampuii hian eizawnna bulfuk nei lova rei tak an awm hnuah kum 2020 atang khan KVK Serchhip District, North Vanlaiphai hmalakna atanga tuina neiin Food Processing lam a luhchilh a. Sunhlu tui sawr atanga bul tanin tunah chuan ‘KIM KIM Food Processing Industry’ tih hmingin thil siamchhuah chi hrang hrang 15 an nei tawh a. Sunhlu bakah hian Mizoram a thei kan neih hrang hrang - Serthlum, Lakhuihthei, Kawlthei, Khawmhma, Dragon Fruit, Star Fruit (Theiherawt) atangte in eitur hrang hrang an siamchhuak mek a. Aizawl Ramhlun, LRM Hospital bulah anmahni product chauh zawrh leh pekchhuahna Outlet/Dawr an siam bawk a ni.

KVK Serchhip District-a Senior Scientist & Head, Dr. T. Vanlalngurzauva chuan National Level Award (Billionaire Farmer of India Award, 2023) dawng thei Serchhip District in a nei chu lawmawm a tih thu sawiin, niminpiah lamah District Level Award (Millionaire Farmer Award, 2023) chu Vanlalfela, North Vanlaiphai chuan a dawn tawh thu leh Serchhip District atanga Farmer pahnihin hetiang chawimawina ropui tak an dawng hi KVK Serchhip thawktu zawng zawng ten thinlung taka an lawmpui thu a sawi a. He hlawhtlinna phena ding tlat KVK Serchhip District-a Subject Matter Specialist (Home Science) K. Lalmalsawmi hmalakna leh thawhrimna chhuanawm a tih thu a sawi bawk.

Chawimawina dawngtu Thuampuii chuan he an hmalakna ah hian KVK-a mithiam te an bel tlat tih sawiin, KVK-a thawktute pawhin an theih anga an tanpui thin thu leh an hrilh anga hma la chhunzawm turin an fuihin a hnathawhna pawh an tlawh fo thin tih a sawi a. Hei bakah hian MzSRLM, Industry Department leh Horticulture Department te pawhin nasa taka an puihbawm thu sawiin, lawmthu a sawi bawk a ni.

Comments

Post a Comment

Popular News (Last 30 Days)

SDVA in hruaitu tur thlang

/
Image
Serchhip District Volleyball Association (SD-VA) chuan nimin khan khan Serchhip Kawnpui VC Hall-ah kum 2024-2025 chhunga an Pawl hruaitu tur thlanna an nei a, President-ah K. Tlangthanmawia (Bazar Veng); Sr. Vice President-ah VL. Hruaitluanga (Bazar Veng); Vice President-ah H. Rohmingliana (Chhim Veng); General Secretary-ah Zothansanga (Chhim Veng); Joint Secretary-ah Jerry Lianhming-thanga (Vengchung) leh Zoramthara (Darnam Veng); Treasurer-ah C. Lalhruaitluangi (Chhiah-tlang Kawn Veng) leh Fin. Secretary-ah R. Lalhnehzauva (Vengchung) te thlan an ni.
Kimchang zawkin »

Truck 8-ah Kuhva ro man

/
Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.
Kimchang zawkin »