MSSSB in hna a lak mek zawh hunah thiah tur niin a tul anga MPSC thuam chak chhoh zel a ni dawn

Chief Minister Lalduhoma'n Mizoram Subordinate Services Selection Board (MSSSB) chu tun-a Exam an Conduct mek an zawh hunah thiah a ni dawn tih sawiin, Zohnahthlak raltlante chhawmdawl kawngah an phak ang tawkin hma an la zel dawn tih a sawi bawk. 

Nimin-a Mizoram Legislative Assembly thutkhawm ah Chief Minister Lalduhoma chuan Mizoram Subordinate Services Selection Board (MSSSB) chungchang hi sawiin, tunah hian Exam conduct mek an nei tih sawiin, hemi an zawh hma hi chuan khawih an tum loh thu leh an zawh hunah chuan an thiat dawn tih a sawi a. Mizoram-ah sawrkar kan neih tawh ten MPSC an ringtawk mai thin tih sawiin, chumi ring tawk lova Political Appointment tih theihna remchang tak, System thar introduce chu tha an ti lo tih a sawi a. “A thawktute an fel lo kan ti lo, Pressure a awm a, chuvang chuan he Board hnuaia hnathawk hna lak ah hian thil fello tak tak a awm tih pawh chiang takin kan hria a ni,” a ti a. “He Board hi a din reng chuan sawrkar apiangin remchang ah an hmang dawn a, Political qualification atanga inhnawhluh tumna a awm anga, chu chu a ni kan ram ti khawlo tu chu a ni,” a ti a. MPSC chu an hna a lo hautak chho zel a nih chuan an thuam chak chho zel dawn tih a sawi bawk.

Chief Minister Lalduhoma chuan Myanmar, Bangladesh leh Manipur atanga Zohnahthlak raltlante chhawmdawl kawngah an phak ang tawkin hma an la zel dawn tih sawiin, raltlan te chungchangah hian sawrkar lapui hotute nen an inbiak thu leh raltlante chu Mizote niin enkawl chhunzawm an ni dawn tih a sawi a. “Kan unau te an ni a, Politic thil a ni lo a, Human issue a nih avangin kan theih ang tawk tawk leh kan resource in a tlin ang zelah chuan he chhawmdawl hna hi kan thawk chhunzawm zel mek a, kan ti zel dawn bawk a ni,” a ti bawk.

Nimin-a Assembly inkhawm-a Larsap thusawi chungchanga lawmthu sawina Motion sawihona a khaikhawmna hunah House Leader Lalduhoma chuan a hriat phak chinah Governor thusawi chu a la tha ber ni-a a hriat thu leh a sawihona pawh an lungrual tlan ber tum ni-a a hriat thu sawiin, lawmawm a tih thu a sawi a. Sawrkar thar chu kar khat emaw leka upa a la nih avangin kum 5 chhunga an kal dan tur zawng zawng puan hman a la ni lo a, Larsap hian ni 100 chhunga hmalak dan tur a rawn ngai pawimawh a ni mai a, khangte bakah khan sawrkar liamta hmalakna leh hmachhawp tam tak kalpui an neih thu a sawi bawk a ni.

Designation Plate tar loh chungchang pawh Chief Minister chuan sawiin, hemi chungchang hi kum 2018-a an Manifesto-ah an dah thu leh hei hi an ennawn hnuah a taka thil thleng nen inrem lohna a awm ni-a ngaih a nih avangin an Manifesto-ah an telh tawh lo tih a sawi a. Boundary Committee din thuai a ni dawn tih pawh sawiin, Member-ah pawl hrang hrang aiawh kimchang taka dah an ni dawn a, Sawrkar hmasain Resource Mobilization Department a din chu thiah a nih tawh thu leh Committee anga kalpui a ni dawn tih sawiin, he Committee hi hautak lo thei ang bera kalpui a nih theih nan Vice Chairman chu cheng khat (Re. 1/-) hlawh a rawih a ni dawn tih a sawi bawk.

Chief Minister chuan, SEDP hnuaia zirtirtute chu sawrkar kum kal mek tawp thleng chhawr zui an ni dawn tih a sawi a, kawlphetha leina man sawrkar in a bat thin chu tihtawp a ni dawn a, kalphung tha lo leh tul lova sum chawi thlawn thin chu tihtawp a ni dawn tih a sawi a. Autonomous District Council huamchhung ah Minister an awm loh chungchanga zawhna chhangin, Aizawl an thik nia a lan thu leh Seat khat chauh petu in Aizawl thik lo se, ADC area-ah ZPM chak tam lo mah se an ngaihsak dawn tih a sawi a, Politics chhe mi hmanga Rulling leh Opposition MLA inthliarna awm thin chu tihtawp a nih tur thu a sawi bawk.