Lenkawl

Tlungvel-a Eklavya Model Residential School (EMRS) sak mek chu nimin khan bialtu MLA leh Assembly Deputy Speaker Er. Lalrinawma chuan a hmunah a tlawh.

Serchhip District Honorary Wildlife Warden RL. Chhuanawma chuan ramsa leh nungcha te humhalh turin mipuite a ngen.

Nimin khan Govt. Ruantlang High School chuan an kum 50 tlinna, Golden Jubilee lawmin Law & Judicial Minister TJ. Lalnuntluanga chuan khuallian niin a hmanpui a, Golden Jubilee lungphun a hawng nghal bawk. He hunah hian Law & Judicial Minister chuan Zirna chu hma-sawnna hrang hrang thlentu leh in nghahna anih thu sawiin, mihring puitling ram leh hnam tana chhawr nahawm chherchhuak tura tan la chhunzawm turin thawktute a chah a ni. Govt. Ruantlang High School hi kum 1972-a din kha a ni a, tun dinhmunah zirtirtu 9, thawktu dang 2 leh zirlai 107 an awm mek a ni.

Nimin khan Khawzawl-ah bawlhhlawh sakhat tawih thei sawngbawl dan inzirtirna 'Solid Waste Management Training' chu DC Conference Hall-ah neih a ni a, he hunah hian khawpui chhunga VC te telin BDO Khawzawl hmalakna in Khawzawl Town Area bika hmun 700 chuang zetah hnawm sawngbawlna khur, Compost Pit siam anih tawh thu tarlan niin bawlh-hlawhte chu thil tangkai leh hlu zawk, Waste to wealth-ah an chantir theih dawn thu te tarlan a ni.

Lunglei High Powered Committe (HPC) sum cheng nuai 13.86 senga dawh Kau Lui Suspension Bridge, Lunglei District Zawlpui-a Saithah Zau panna chu nimin khan HPC Vice Chairman Lawmawma Tochhawng chuan a hawng a, Lei hi ft. 4-a zau niin ft. 420-a thui a ni a, a hmaa Lei awm thin chu kum 2017 khan tuilian in a tichhia a, kuthnathawktute tana kawng pawimawh tak a nih bakah Tuisen leh Bolia nena inkal-pawhna pawimawh tak a ni bawk.

Apollo School of Nursing chuan nimin khan Aizawl-a Dawrpui Multipurpose Hall-ah Capping and Lamp Lighting Ceremony vawi 18-na an hmang a, he hun hi Health Minister Dr. R. Lalthangliana chuan hmanpuiin Nursing chu eizawnna zahawm tak leh ringtute tan phei chuan Isua rawngbawlna chhawmnung zeltu te zing a mi an ni tih a sawi a, damlo te tan damna leh hlimna tam tak thlen thei tu, inpekna thuk tak nena thawh ngai a nih thu a sawi bawk. Health Minister chuan Nurse lukhum (cap) chuan Nurse te nunah hmun pawimawh tak changin inpum-khatna a entir tih a sawi a, Lamp lighting chuan mite tanpuitu, mite tana thlamuanna thlen tu, beiseina pe tu leh thiamna bik nei pholanna a nih thu a sawi bawk. Apollo School of Nursing, Luangmual atang hian mi 403 ten Nurse zirchhuak tawhin nimin khan mi 36 te an chhuak a ni.

Assembly Speaker Lalrinliana Sailo chuan nimin khan Khawruhlian Supply Centre-ah Supply Godown sak thar a hawng a, Mizoram sawrkarin ei leh bar a ngai pawimawh hle tih sawiin, Mizote riltam tuihala an awm a phal lo in nasa takin hma a la mek zel tih a sawi a ni. Khawruhlian Supply Godown hi a dung ft. 58 leh a vang ft. 58-a zau niin buhfai Quintal 3000 a dah theih a, Godown bakah hian Quarters pahnih leh Toilet Block te awm nghalin a vaiin Rs. 2,03,57,805/- senga sak a ni a, Babie Construction & Consultancy Services ten a sak hna an thawk a ni. Supply Minister K. Lalrinliana chuan nimin-a Khawruhlian Supply Godown thar hawnna hi hmanpuiin New Vervek khua ah Supply Godown thar a hawng nghal bawk a, he Godown thar hi NABARD Warehouse Infrastructure Fund (WIF) Project kaltlanga cheng nuai 158.66 senga sak niin buhfai quintal 200 leng thei tura ruahman a ni.

Mizoram District hrang hrang zingah Aizawl District chiah COVID-19 hri kai enkawllai awmna a ni ta.

Mizoram Pradesh Congress Committee (MPCC) President Lalsawta chuan kum 2023 General Election lo awm tûrah Siaha bial-a Congress Party Candidate tûr N. Chakhai MCS (Rtd) a ni tih nimin khan a puang.

Chief Minister Zoramthanga chuan nimin khan Mamit tlawhin sawrkar hmalakna kal mek hrang hrangte a hmunah a enfiah a, Vantlang Inkhawm neih a hmanpui bawk.

Mizoram-ah Bank 24 awm mekin Babk Branch 239 a awm mek.

Mizoram People Forum (MPF) leh Mizoram-a Political Party hrang hrang te chuan inthlan dawna Thawhhona Thuthlung an ziah chu nimin khan thlirletna neiin nakum-a inthlanpui neih tur atana MPF in rawtna an siam te pawh thlirho a ni bawk.

Mizoram Governor Hari Babu Kambhampati chuan State pawn leh rampawn lama hnathawh tur te kan thalai ten an thawh theih nan Vocational Training leh Skill Development training tha tak kan pek a ngai tih sawiin, rampawn-a hnathawh tur hmuh sak thei nia insawi lemchang tam tak an awm tih erawh hriat a pawimawh thu a sawi.

Serchhip Town Joint Village Council chuan nimin khan Serchhip Kawnpui VC Hall-ah thutkhawm neiin Serchhip-a buh rate hmanlai chu tihsan nise an ti a. Kumin a Buh rate tur pawh ruahman nghalin Tin khat zelah In lamah Rs. 350/- leh Ram lamah Rs. 300/- a ni tawh ang. Serchhip Town Joint VC chuan Buh thar tura tha leh sum sen a hautak tak em avangin Buh Rate hi tihsan a tul ve tawh hle nia an hriat thu sawiin, an rate siam ang zawm theuh turin mipuite a ngen nghal bawk. Hei bakah hian Joint VC hian Town chhung hmasawnna hnathawh te a hmuna tlawha enfiah leh a tul anga hmalak an rel bawk.

Nimin khan Serchhip-ah District Level Narco Coordination Centre (NCORD) Committee thutkhawm neih niin ruihhlo dona kawnga hmalakna leh hmalak zel dan tur hrang hrang sawiho a ni a. Kumin chhungin Serchhip Police te leh Excise & Narcotics Department te chuan Heroin No. 4 tam tham tak an man tawh a ni.

National Highway-54 laihzauh hna thawh mekah Serchhip District huamchhungah mi 2072 te zangnadawmna pek an ni tawh a, zangnadawmna pek loh mi 7 an la awm.

India Constitution Day pualin nimin khan Govt. Serchhip College leh DIET Serchhip-ah India Danpui Thuhmahruai (Preamble to the Indian Constitution) chhiar rualna neih a ni.

ZPM Thalai Hqrs. President tura ruat Dr. C. Lalrammawia chuan nimin khan President kalchhuak tur Malsawmzuala Ralte hnen atangin mawhphurhna a la ta a, ZPM Thalai President thar chuan ZPM chu mipuite tibeidawngtu tur ni lovin, beidawngte tâna beiseina siamtu a ni zawk tih sawiin, Pu-te tihsual chulmam tuma hmanhlel tur an ni lo tih a sawi bawk.

MNF Adviser leh Home Minister Lalchamliana chuan MNF sawrkarin Kohhran leh mipui duhdana Zu a khap hnuah Zu vanga thi Police an tlem tih nimin-a MNF in Mizo Hnam Run-a Chhung Inkhawm an neih ah a sawi a, Damdawi ruihhlo do tura Central YMA in Central Anti Drugs Squad (CADS) an din chu tha a tih thu leh kan thlawp a pawimawh thu a sawi bawk.

Rokunga Memorial Society buatsaih ‘Rokunga Award 2021’ chu nimin khan Saitual Venglai-a Malsawmkima hnenah hlan a ni. Aijal Club-a Rokunga Award 2021 hlanna inkhawm ah hian Rokunga Memorial Society Vice Chairman leh Award Selection Committee Chairman ten Malsawmkima hnenah hian Rokunga Award 2021 hi an hlan a. Award hian Trophy leh Tangkapui bakah thuchei leh sumfai Rs. 50,000/- a kengtel a ni. Rokunga Award 2021 dawngtu Malsawmkima hi kum 1978 khan Saitual khuaa tlawmngai ber a puan a lo ni tawh a. Kum 2013-ah khan Saitual khawtlang in Tlawmngai Nopui an lo hlan tawh bawk a ni.

Nimin khan Chief Minister Zoramthanga hovin Pradhan Mantri Gram Sadak Yojana (PMGSY) Review Meeting neih a ni a, he Scheme hnuaia State chhunga kawng siam hna thawh mek leh hmabak awm te sawiho a ni.

Nimin khan Mizoram-ah COVID-19 hri kai chhinchhiah belh awm lovin hri kai zingah mi 2 te chhuahtir an ni thung a, heti hian nimin tlai thleng khan Mizoram-ah COVID-19 hri kai enkawllai mi 7 la awmin a zawnin ni 3 chhung hri kai hmuhchhuah thar an awm lo ta a ni.

Thla thar December 2 thleng awh tur ‘Museum Week’ chu nimin atang khan hman tan a ni a, Art & Culture Department Director R. Hmingthanzuala chuan nimin khan Aizawl-ah Museum Week hi a hawng a ni. Aizawl-a State Museum-ah hian objects 3911 neiin chung zinga 723 chu  Showcase 100-ah an phochhuak mek a; kumin January atanga November thlengin Museum tlawhtu mi 8563 an awm tawh a, heng zing a mi 72 hi rampawn lam atanga lo kal an ni a, VIP 6 in an tlawh bawk a, Museum Week hman chhung hian mipuiten man chawi lovin Aizawl-a Museum an tlawh thei dawn a ni.

Right to Information (RTI) dan hnuaiah sawrkar Department (Public Authority) tin te chu an website-ah information tam thei ang ber dah chhuak/tarlang tur a tih an ni a, chumi a hmala tha lo Department 41 te chu Mizoram Information Commission (MIC) in a ko tawh. Nimin khan Administrative Training Institute (ATI) buatsaihin Aizawl Press Club-ah Chanchinbu mite pualin RTI chungchang zirhona neih a ni a, he hun a zirtirna petu MIC-a Deputy Secretary Lily sawi danin, RTI dan hnuaiah Public Authority tin te chu khua leh tuiin RTI dan hmang kher lo a information an neih theih nan information tam thei ang ber eng hmanrua hmang emaw in an dahchhuak/tarlang tur a ni a, chumi atana tha ber chu internet a nih avangin information te chu website-ah dah tur a ni.Public Authority ten an website-ah information an dah that leh that loh chu endik reng a ni bawk.

Home Minister leh MNF Adviser Lalchamliana chuan Assam nena kan ramri chungchangah Boundary Committee in a duhdan ang zelin an kal dawn tih nimin khan Aizawl-a Mizo Hnam Run-a thu a sawina ah a sawi a, “Zawhna lian tak awm mek chu, ‘Mizoram in kan hauh mek 1875 Innerline Forest Area hi kan duh ang ngeiin Assam hian min pe ta sela, Assembly Constituency panga (5) rinluh a ngai dawn a, kan duh tak tak ang em?’ tih hi zawhna lian tak, Opinion Poll lak hialna awm a ni,” a ti a. “Mi thenkhatin ‘Kan umchhuak vek anga ni mai lawm’ an ti ngawt a. Tunlai khawvel ah chutiangin a chet theih tawh loh tih hi kan hriat tlan a tha a ni,” a ti bawk.

Union Minister of State for Minority Affairs John Barla chuan nimin khan Mizoram Kohhran Hruaitute Committee (MKHC) hruaitute chu Raj Bhavan-ah kawmin MKHC hruaitute chuan Kristian ten harsatna an tawh te an thlen.

Maudarh khuaa ABCI Lung lakna hmun (Quarry) chim chu nimin khan Health Minister Dr. R. Lalthangliana chuan a hmunah tlawhin thil thlen dan leh hmalak zui dan te a enfiah.

Kuki-Chin National Army leh Bangladesh Army te inkah avanga Bangladesh atanga Mizoram chhunga sahimna zawnga lo lutte lo tuamhlawm dan leh enkawl zui dan tur chu nimin khan Lawngtlai-ah District Bawrhsap hova sawiho a ni.

Serchhip District tana Up-Scaling of Aapda Mitra Scheme Training Batch 2-na chu Zirtawpni khan zawhfel niin Serchhip District atangin mi 100 in Training hi an zo ta a ni.

Serchhip District Cricket Association (SDCA) buatsaih Season Opening Tournament chu Inrinni khan DC Playground, Khawtetlang-ah khelh tan a ni.

Central YMA leh Mizoram State AIDS Control Society (MSACS) thawhdunna anga Serchhip Sub-Hqrs. YMA huamchhunga YMA Branch te tana Mizo Hnam Lam leh Pipu zai a intihsiakna neih chu Zirtawpni zan khan zawhfel a ni ta a. He intihsiakna ah hian YMA Branch 8 telin a pumpui-ah Hualtu Branch chu pakhatna niin lawmman an Rs. 50,000/- an dawng a, Serchhip Chanmari Branch chu pahnihna niin Rs. 30,000/- an dawn bakah pathumna Serchhip Vengchung Branch chuan Rs. 15,000/- an dawng bawk a ni. He intihsiakna a pakhatna Hualtu Branch te hi State Level intihsiakna Dec. 1, 2022-a neih turah Serchhip Sub-Hqrs. YMA aiawhin an tel dawn a ni.

Serchhip Thalai Pawl (STP) chuan kum danga Krismas dawna mi harsate tanpuina an pek thin angin kumin hian pek leh nise an ti a. Hemi atan hian thla thar Dec. 22 khian Serchhip Bazar leh Chhiahtlang Kawn-ah Charity Concert neih an tum thu an sawi.

Hnahthial District Maudarh-a tun thla ni 14-a quarry chim avanga mi 12 an thihna chu sawrkar laipui-a Mining lama mithiamten an endik mek a, helai hmun hmangtu ABCI bakah hnathawkte chu thu an zawtfiah bawk a ni. He vanduaina a thi hriat hnamdang pakhat ruang erawh nimin thleng khan hmuh a la ni lo thung.

Nimin leh niminpiah khan Mizoram-ah CO-VID-19 hri kai hmuhchhuah awm belh lovin Inrinni khan mi pahnih leh nimin-ah mi 4 te enkawl dam an ni leh a. Heti hian nimin tlai thleng khan Mizoram-ah COVID-19 hri kai enkawllai mi 9 awmin Aizawl District-ah mi 8 leh Lunglei District-ah mi pakhat te an ni.

Mizoram sawrkarin dan hnuaiah Grape Wine zawrh a remtih tak avangin zawrh diltu (Vendor license)-te dilna chu enfiah mek a ni.

Mizoram-a rawn zin Union Minister of State for Minority Affairs John Barla chuan Inrinni khan Chief Minister Zoramthanga chu a chenna CM Bungalow-ah hmuin inkawmna an nei a, he hunah hian Union Minister of State John Barla chuan District Council Affairs & Minority Affairs Department leh Social Welfare & Tribal Affairs Department te nena meeting an neih thu leh an thu rel tlangpui a sawipui a. Minority te hmasawnna tur sawrkar laipuiin a ngaihpawimawh thu leh Mizoram-a hmalakna te an sawiho thu sawiin, Mizoram chhungah minority awm mahse, India ram pum thlir chuan Mizoram a chengte chu minority anga ngaih theih a nih thu te an sawi a ni. Union Minister of State chuan minority hrang hrang te hi ram hmasawna ah thawh hlawk tak tak an nih thu pawh sawiin, Kristian te chu entirna ah hmangin, ram hruaitu langsar tak tak te hi Kristian zirna In atanga zirchhuak an nih thu te a sawi bawk.

India ram hmundang te rualin Inrinni khan Raj Bhavan-ah Constitution Day 2022 puala inkhawm neih a ni a, a ruala Preamble to the Constitution of India chhiarchhuahna hun chu Governor Hari Babu Kambhampati kaihhruaiin neih a ni. Constitution Day hi kum 2015 khan Prime Minister Narendra Modi chuan Dr. BR Ambedkar lim a hawnnaah kumtina hman turin a puang a. He ni-ah hian khua leh tui te chu India Danpui chungchanga inzirtirna nei thin tur leh India Danpui min siamsaktute zahna lantir thin tura beisei an ni. November 26, 1949 khan the Constituent Assembly chuan India danpui hi pawmin khua leh tui te tan a hlan a ni. Kumin Constitution Day atan hian thupui-ah ‘India : The Mother of Democracy tih hman niin sawrkar Pisa hrang hrangah Vawiin hian Preamble to the Constitution of India hi chhamrual a ni bawk.

Taxation Minister Lalchamliana chuan Special Assistance to States for Capital Investment (SASCI) chu hmasawnna hnathawh nan a tangkai hle tih sawiin, kum 2023-24 ah pawn chhunzawm zel a rawt.

Mara Autonomous District Council (MADC)-a Congress leh MNF sawrkar intawm paihthlak a nih hnuah Party mal-a Seat ngah ber BJP chuan MNF nen sawrkar aan siam dawn ta niin a lang.

Rural Development Department changtu Minister Lalruatkima chuan Mizoram sawrkar in hmeichhia te hamthatna tura theihtawp a chhuah thu a sawi.

Mizoram-a Pradhan Mantri Jan Vikas Karyakram (PMJVK) kalpui dan leh a dinhmun hrang hrang sawihona chu Inrinni khan Union Minister of State for Minority Affairs John Barla hovin neih a ni.

Kum 2021-22 atana Tribal Scholarship (Pre & Post matric) atan Rs. 36,43,48,530/- ruahman a ni a, a dawngtu tur zirlai zaa 96 (96%) pek an ni tawh a. Technical problem vanga la dawng loten an dawn thuai theih nan Mizoram Scholarship Board (MSB) chuan hma a la mek.

Union Minister of State for Minority Affairs John Barla chuan nimin khan Lawngtlai tlawhin, hmasawnna hna thawh mek leh hmunhma pawimawh thenkhat a tlawh bakah Lawngtlai-a Sawrkar Laipui ruahmanna hnuaia hmasawnna hna thawh hrang hrang thlir hovin Head of Office-te thutkhawm a neihpui.

Central YMA leh Mizoram State AIDS Control Society (MSACS) te thawhdunna 'Zoram Harh Rawh-Campaign' neih mekah nimin khan Serchhip-ah YMA Branch te tan Mizo Hnam Lam leh Pipu zai hmanga inelna neih a ni a, he hun hi District Bawrhsap Nazuk Kumar IAS chuan a hmanpui a ni.

Fisheries Department buatsaihin nimin khan Serchhip District chhunga Sangha khawitute tan Sangha khawi chungchang inzirtirna chu New Serchhip YMA Hall-ah neih a ni.

Baptist Church of Mizoram (BCM)-a rorelna sang ber dawttu, Area Baptist Council (ABC) Inkhawmpui chu naktuk Pathianni hmang hian Area hrang hrangah neih a ni dawn.

Serchhip Police te chuan nimin chhun khan Serchhip Bazar-ah Heroin No. 4 Hawng li (4) leh a neitu nia hriat Langsuanthang (30), Letpanchhawng, Myanmar nia insawi te chu an man a, Langsuanthang hian kum 2018 atang khan sumdawngin Mizoram-ah a rawn kal tawh thu sawiin, a thiante In luah ah a thleng thin niin a sawi a, heng ruihhlo an man sak te hi a thil zawrh hrang hrang karah Bawm pakhat-ah a dah niin Serchhip Police te chuan thubuai an siam sak nghal a ni.

Presbyterian Church of India (PCI) in kum 1997 atanga November thla Zirtawpni hnuhnung bera an hman thin ‘Kohhran Hmeichhe Ni’ chu nimin khan Mizoram Synod hnuaia Kohhran hrang hrangah hman leh a ni a, kumin hian thupui inang tlang ‘Nute leh Fanau Enkawl’ tih thupui hmanga Zoramthangi Chhangte, New Capital Complex thuziah chu zirho a ni.

November 24-25, 2022 chhung khan Kohima Science College (A), Jotsoma, Nagaland-ah 'International Workshop on Current and Traditional Practices for Sustainable Management of Aquatic Ecosystems' neih niin Mizoram atangin Ramlai Society for Traditional Medicine (RASTRAM), Serchhip-a Vice President (Marketing), Laldinpuia, Serchhip Hmar Veng chu a tel a, nimin khan 'Revitalization of Traditional Medicine in Serchhip District, Mizoram' tih thupui hmangin presentation a pe a ni.

Mizoram Excise & Narcotics Department chuan tunhnai kum nga chhungin Heroin leh Ganja an man zat chu a kum telin a pung. END te chhinchhiah danin kum 2018-ah Heroin kgs. 8.716 manin kum 2019-ah kg 12.596, kum 2020-ah kg 11.710, kum 2021-ah kg 18.906 leh kumin ah September thla thleng khan kg 19.978 an man tawh a. Ganja pawh kumtin an man tam zel a, kum 2018-ah kg 187.568 manin kum 2019-ah kg 370.068, kum 2020-ah kg 127.449, kum 2021-ah kg 376.204 leh kumin 2022 September thla tawp thlengin kg 147.784 an man tawh bawk a ni. Kum 2020-a Heroin leh Ganja man a tlem chhan hi hripui vanga Lockdown kalpui vang nia hriat a ni.

Environment, Forest & Climate Change Department, Champhai District chuan kumin ah dan lova ramdang atanga nungcha phurhluh an man 625 chu Aizawl Zoological Park-ah an dahlut tawh.

Darlung khua in kum 100 a tlinna, Centenary lawmna chu nimin khan neih niin Tourism Minister Robert Romawia Royte chuan he hun hi a hmanpui a, Centenary Lungphun a hawn hnuah Darlung Lallula Hall-ah Centenary lawmna ah Darlung khua in kum 100 a tlinna denchhena Darlung haw runpui buatsaiha, Centenary lawmna an nei chu a lawmpui thu a sawi a. Darlung khawchhuak hmun hrang hranga mi ten an khua ngai pawimawha an haw khawm chu a entawn tlakin Mizo nun ze mawi tak a nih thu a sawi bawk.

COVID-19 hripui leng avang leh Myan-mar tualchhung buaina avanga Indo-Myanmar border Trade, Zokhawthar kaltlanga bungraw phurhluh te hun engemawchen a khaihlak hnuah tunlai hian bungraw chi hrang hrang phurhluh a tam hle nia thudawn niin Mizoram atangin Maida thawnchhuah a ni thung a. Myanmar lamah Duty (Immigration, Police leh Custom) pakhatmah awm lovin Mizoram lamah pawh tunhma angin Land Custom Station-ah duty an awm lo nia thudawn niin Custom te hi Mualkawi daiah an duty thung nia thudawn a ni a, bungraw phurh te pawh rinhlelh bak enfiah a ni lo nia thudawn a ni.

Mizoram sawrkar-a Secretary, General Administration Department-in tun thla ni 23-a thuchhuah a lo siam tawh angin Nov. 28, 2022 (Thawhtanni) chawhma dar 11:00 khian Constitution Day pualin Mizoram Sawrkar Office, School, College, Autonomous Bodies, PSU leh a dangte ah Preamble of Constitution chhiar rual tur a ni a. Constitution Day hi November 26 niin Inrinni-ah a tlak avangin hun hman hun tur hi a sawn a ni a, Ministry of Parliamentary Affaris chuan a duh apiang tel theihna leh Certificate dawn theihna tur ruahmanna siam bawkin Online-in Preamble chu Official language 22 a chhiar tur hi dah a ni.

Saitual District chhunga Tualbung khua in kum 100 tlin lawmna an neih chu Assembly Speaker Lalrinliana Sailo leh P&E Minister R. Lalzirliana te chuan an hmanpui.

Chief Secretary hova State Level Coordination Committee (SLCC) on Approval of Updated Provisional Results of the 7th Economic Census thukhawm chuan Mizoram State Economic Census Survey Provisional Results chu a pawmpui.

Mizoram Governor Hari Babu Kambhampati chuan Architect te rawn nachang hriat kan intihhmuh zel a ngai tawh tih a sawi.

Deputy Chief Minister Tawnluia chuan Sawrkarin Provisional Employees te a ngaihthah lo tih sawiin, an hamthatna tur ruahmmanna hrang hrang sawrkarin a siamsak thu a sawi.

Mara Autonomous District Council (MADC)-a H. Malvina kaihhruai Congress leh MNF sawrkar intawm chu nimin khan No Confidence Motion hmanga paihthlak a ni.

Serchhip District-a High School leh Higher Secondary School zirlaite tan nimin khan District Level Kala Utsav leh Middle School tan Rangotsav intihsiakna neih a ni.

Mizoram-a Aam Aadmi Party (AAP) hruaitute chuan nimin khan Serchhip rawn tlawhin Mizoram-a AAP an lakluh chhan chu Lal Isua duh dan a rorel an tum tlat vang a nih thu an sawi a. Nakum-a Mizoram inthlanpui nei turah theihtawp chhuaha Candidate a tam thei ang ber in dah an tum thu an sawi.

Assembly Deputy Speaker leh Tuikum bialtu MLA Er. Lalrinawma chuan nimin khan a bial chhunga Ngentiang khua ah Health Clinic Centre thar a hawng.

Serchhip Police-a District Special Branch (DSB) te chuan an thudawn bawhzui nimin chhun khan Serchhip IOC Veng-ah Heroin No. 4 nia rinhlelh Hawng khat (17.42 grams) chu an man a, a neitu nia insawi Zothangpuii (22), New Serchhip Venglai nia insawi pawh man nghal niin thubuai siam sak nghal a ni.

Central YMA leh Mizoram State AIDS Control Society (MSACS) thwhdunna a ‘Zoram Harh Rawh-Campaign’ neih mekah Vawiin hian Serchhip-ah Mizo Hnam Lam leh Zai-a intihsiakna neih a ni dawn.

Mizoram-ah Dengue vanga thi mi 5 chhinchhiah an awm tawh a, hetihlai hian kumin chhunga Dengue vei hmuhchhuah tawh zawng zawng zat chu mi 1,224 an tling tawh.

Bangladesh Army leh Arakan Army-te tangrualin Kuki Chin National Army-te nasa taka an kah avanga Bangladesh Chittagong Hill Tracks-a kan Mizo unau te Mizoram-a rawn raltlan te Pawl hrang hrangten ngaihsakna an lantir chu Peace Accord MNF Returnees’ Association (PAMRA) chuan lawmawm an tih thu thuchhuah siamin an tarlang.

Mizoram-ah nimin khan COVID-19 hri kai chhinchhiah thar mi pakhat awmin hri kai te zingah mi pahnih chu anmahni enkawlna hmun atanga chhuahtir an ni thung a. Heti hian nimin tlai thleng khan Mizoram-ah COVID-19 hri kai enkawllai mi 14 la awmin a hri kai hmuh te atangin za zela 99.69 enkawl dam an ni tawh a, hri kai zingah mi 726 an boral tawh a ni.

Tualchhung hmawsawnna tura Village Council te rorelna hmun atan leh khawtlang in tangkai taka an hman turin LAD Minister K. Lalrinliana chuan Nilaini khan Lenchim Panchayat Bhawan (Village Council House) chu a hawng a, Rashtriya Gram Swaraj Abhiyan (RGSA) Scheme hnuaia cheng nuai 20 senga sak a ni. He hunah hian Panchayat Bhawan sak a nih chhan te mipuite hnenah hrilh nghal an ni bawk.

Lungsum khua in an khaw kum 100 tlinna (Centenary) an lawmna nimin-a Lungsum Playground-a neih chu School Education Minister Lalchhandama Ralte chuan a hmanpui a, Pathian hruaina a Lungsum khua in kum 100 a tling ta chu lawmawm a tih thu sawiin, rilru put hmang leh thil thlir danah kum 100 tlin lawm thei tawh khua tih inhriaa rilru puitling zia put chhoh deuh deuh a ngaih thu a sawi a ni. Nimin-a he hun hman hi Organising Chairman C. Lalkhumtira chuan kaihruaiin Sinlung Hills Council-a ES C. Lalnuntluanga pawhin a hmanpui bawk a ni.

Nizan hmasa khan Vairengte-a Kuhva Kudam pakhatah dan lova Myanmar atanga lakluh, State pawna hralh tur nia hriat Teak Cubic 200 leh Opium chi bag 100 man a ni.

Zofate khawvel a la awm ngailo ‘Pathian Lal Ram Sawrkar tana Inkhawmpui’ chu thla thar December 1 atang 3 chhung khian Aizawl Chanmari YMA Hall-ah neih a ni dawn.

Ven theih natna laka nu leh nausen thihna a thlen tawh lohna tura Sawrkar laipui hmalakna Surakshit Matritva Aashwasan (SUMAN) kalpui dan tur chu nimin khan Lawngtlai-ah sawiho a ni.

Kumin September, 2022-a Aizawl Zonuam Veng-a hmeichhe naupang pakhat pawngsual ni ngeia Doctor-te'n an hriat kaihhnawiha man, naute nu leh pate chu Polygraph Tests (Lie detector) hmangin thu zawhfiah an ni dawn.

Nimin khan Clinical Knowledge & Skills Improvement (CKSI) App chu khuhhawnna neih a ni.

Commerce and Industry Minister Dr. R. Lalthangliana chuan Mizoram chu Kaladan Multi-Modal Transit Transport Project (KMMTTP) hlawkna tel tur ber State a nih thu a sawi.

Mizoram Science Congress 2022 chu nimin khan Mizoram Legislative Assembly Annexe Conference Hall-ah neih niin I&PR Minister Lalruatkima chuan khuallian nia hmanpuiin hemi puala Science Exhibition neih pawh a hmanpui bawk.

Serchhip District chhunga Bank hrang hrang ten September 2022 Quarter tawp thlenga sum an dawn atanga Loan an pekchhuah Credit Deposit (CD) Ratio chu 65.91% a ni a, kum khat chhunga Quarter tinah CD Ratio hian san lam panin kum khat chhungin 11.5% velin a sang chho hman a ni.

Serchhip District chhung Zirna In thlanbik a Skill Building Programme kalpui tur chu nimin khan Serchhip District Bawrhsap Nazuk Kumar IAS chuan Marian High School Serchhip-ah a hawng.

Serchhip District Hospital sakna tur chung-changa JAC on Serchhip District Hospital Site te PIL thehluh chu Gauhati High Court, Mizoram Bench chuan ngaihtuahin sawrkar in Bukpui-a sa tura Official-a hmalakna a neih loh avangin PIL hi tihtawp a ni.

Serchhip District Cricket Association in a buatsaih ‘Season Opening Tournament’ chu tunkar Inrinni khian DC Playground, Khawtetlang-ah khelh tan a ni dawn.

Mizoram Chief Minister Zoramthanga chuan a Discretionary Grant 2022-2023 atangin Mizoram hmun hrang hranga damdawi In, Hnu-chham In, Rescue Centre leh Home hrang hrang ah te Krismas lo thleng tur pualin tanpuina sumfai Rs. 2,30,000/- zet a semchhuak leh a. Serchhip District-ah chuan Shalom Special School tan Rs. 3000/-, Civil Hospital Serchhip leh Adult Rehabilitation Centre, Chhiahtlang-ah Rs. 2000/- ve ve, Zoar Rescue Centre-ah Rs. 1500/- leh Orphanage Home, Observation Home, Hmangaihna In leh Old Age Home-ah Rs. 1000/- theuh pek tura ruahman a ni.

November ni 14, 2022 tlai-a Maudarh khuaa ABCI Lung lakna hmun (Quarry) chim in a delh nia hriat Jahidul Islam (27), Assam ruang chu zawn chhunzawm zel niin nimin thleng khan hmuh ala ni lo a, ruang zawnna hmun hi NDRF India, 2 Bn. MAP Lunglei, 3 Bn. MAP Canine Squad-te leh Police te bakah NHIDCL hotute chuan vilin Jahidul Islam-a chhungte pawhin vanduaina thlenna hmun hi an thleng tawh a ni.

Nimin khan Mizoram-ah COVID-19 hri kai chhinchhiah thar mi 3 awmin nimin khan mi 3 bawk anmahni enkawlna hmun atanga chhuahtir an ni leh a, heti hian nimin tlai thleng khan Mi-zoram-ah COVID-19 hri kai enkawllai mi 15 an la awm a, Mizoram-a COVID-19 hri kai hmuhchhuah tawh 2,38,945 te atangin 2,38,204 te chu anmahni enkawlna hmun atanga chhuah-tir an ni tawh a ni.

Mizoram State Planning Board Vice Chairman H. Rammawi hovin nimin khan Tlawng Lui humhalh dan tur chu Planning and Programme Implementation Committee Room-ah ngaih-tuah a ni a. He hunah hian Tlawng lui leh peng luite te humhalhna atana pawimawh- bawlhhlawh paih dan chungchangte, a lui leh a chhehvela awm Sangha, ransa leh rannung humhalh dan turte sawiho niin Mizoram sawrkarin hma a lakna turte an sawiho bawk a ni. Mizoram-a lui sei ber Tlawng lui hi Zopui tlang, Zobawk, Lunglei atanga intan a ni.

New Delhi-a cham mek ICT Minister Robert Romawia Royte chuan Mizoram ICT Department-in Projects an siamte MEITY Ministry leh Dept. of Telecommunications (DoT) ten an zirchiana an recommend hnua Finance Ministry an thawn tawh, la tang mekte chu umzuiin Finance Ministry-a a changtu Dr. Sajjan Singh Yaday, Addl Secretary leh Director Dependra Kumar te a kawm a. Finance Ministry chuan IT Projects hrang hrang atan cheng nuai 7225 chu niminpiah khan sanction nghalin Dept. of Expenditure, Finance Ministry chuan cheng nuai 2500 chu Mizoram sawrkar in hmasawnna ruhrel a siamna tur atan a sanction bawk.

Union Minister of State for Environment, Forest and Climate Change, Consumer Affairs leh Food & Public Distribution Ashwini Kumar Choubey chuan nimin zing khan Chief Minister Zoramthanga chu MacDonald Hill-a a chenna ah kawmin thing leh mau hausakna Mizoram leh India hmarchhak State ten an neih chu economy hmasawnna atana tangkaia hman a nih theih dan an sawidun a. A bik takin mau tangkaina leh hmarchhak State-te tana mau hmanga economy nasa taka chawisan a nih theih dan te Chief Minister hian a sawipui bawk.

Union Minister of State for Consumer Affairs, Food & Public Distribution Aswhini Kumar Choubey hovin niminpiah tlai khan FCS&CA, Food Corporation of India (FCI), Bureau of Indian Standards (BIS) leh Central Warehousing Corporation (CWC) Official-te chuan an hmalakna chi hrang hrang an thlirho. CWLW Conference Hall-a thlirletna hun hi FCS&CA Secretary Ramdinliani'n a kaihruai a, FCS&CA, FCI, BIS leh Central Warehousing Corporation aiawh ten an hmalakna leh harsatna an tawh chi hrang hrangte an tarlang a, heng te hi Union Minister hian uluk taka ngaihthlak sakin a theih ang anga chinfel dan tur zawn a nih tur thu a sawi a. FCS&CA bill sawrkar laipui-a la tang (pending) cheng vbc. 29 la awm chu rang taka chinfel a nih tur thu sawiin, heng zinga cheng vbc. 11.5 chu kumin December ni 15 ralhmaa tihchhuah (release) a nih tur thu a sawi bawk.

Zan hnih riaka Mizoram-a rawn zin Union Minister of State Ashwini Kumar Choubey leh Mizoram Legislative Assembly Speaker Lalrinliana Sailo te chu niminpiah tlai khan Assembly Speaker Office Chamber-ah an inkawm.

Tripura Transit Camp-a Bru te chu nakum 2023-a Mizoram Assembly inthlanpui neih hma ngeiin Mizoram Electoral Roll atanga paih fel hman tum a ni.

Mizoram Governor Hari Babu Kambhampati chuan nimin khan Assam Rifles sipai 18 te hnenah chawimawina tangkapui leh thuziak a hlan.

MAMCO Managing Director nihna hmanga Contract leh Supply pek tiam a thamna cheng nuai 268 latu Lalremthanga, Lunglei Chanmari chu kum nga (5) chhung Jail-a táng tur leh cheng nuai 15 chawi turin Court-in a hrem.

Mizoram-a rawn zin Union Minister of State for Environment Forest and Climate Change Ashwini Kumar Choubey chuan nimin zing khan Prime Minister in Rozgar Mela puala hun a hman chu Aizawl atanga hmanpuiin Mizoram chhung atanga hna hmu thar thalai 79 te hnenah Appointment Letter a hlan. 

Jal Jeevan Survekshan 2023 Champions of Change kaltlanga In tin thlengpha tui connection pek tam kawnga inelna kalpui mekah Serchhip District chuan High Achievers 4 Star Category hnuaiah pahnihna dinhmun a hauh.

Lirnghing avanga chhiatrupna thleng thulha chhanchhuah leh chhawmdawl hna thawh dan a taka entirna leh zirhona hun Earthquake Mega Mockdrill chu nimin khan Serchhip-ah neih a ni.

Nimin khan Tuikum bialtu MLA leh Assembly Deputy Speaker Er. Lalrinawma chuan a bial chhung Khumtung khuaa Playground thar hawnna hun hmanpuiin Darlawng-a MHIP Run sak thar chu a hawng bawk.

Tunkar Ningani-a Serchhip DTO Office Building thar hawng tura ruahmanna lo siam tawh chu Building hawng tura beisei Transport Minister in Mizoram-a rawn zin tur Union Minister a lo dawnsawn a tul dawn avangin thulh leh rih a ni a, hun remchang hmasa ah a hawnna hi neih tura ruahman a ni.

Sawrkai laipui chuan National Food Security Act, 2013 hnuaia Fair Price Shop kaltlanga subsidy a buhfai dawngtu Ration Card neitu zawng zawngten, an Ration Card leh an Adhaar Card an thlunzawm ngei tura hriattirna a tih-chhuah hnuah hemi atana huntiam a lo siam tawh chu a pawtsei leh a, ruahmanna hmasa ah chuan September 30 thleng kha hun hawn niin hei hi kumin December 31 thleng atan pawhsei a ni.

Mizoram Sawrkar Health & Family Welfare Department hnuaia National Health Mission (NHM)-in State chhunga Ayushman Bharat - Health & Wellness Centre (AB-HWC) tina Health Mela (Hriselna Kutpui) buatsaih tura a ruahman chu Serchhip District-ah neih mek zel niin nimin khan Rullam Sub-Centre ah Health Mela hi neih leh a ni a, heti hian Serchhip District chhunga Sub-Centre zingah Khawbel SC tihloh hmundang zawngah Health Mela hi neih a ni tawh a ni. Nimin-a Rullam khuaa Health Mela neih hi Serchhip atangin District Immunization Officer Dr. Lalngaihawmi Chhangte chuan a hmanpui a, hemi rual hian Ngentiang PHC hnuaia Sub-Centre awm, Rullam, Lungpho leh Thinglian bakah Hmunzawl Sub-Centre te tlawhin an hnathawh dan a enpui bakah an harsatna neih te a ngaihthlak sak bawk.

Lai Autonomous District Council (LA-DC)-in kum 50 a tlinna, Golden Jubilee lawmna neih mek kharna leh a lawmna pui ber ni khatna chu nimin khan CYLA Playground Lawngtlai-ah neih a ni a, he hun hi Lawngtlai East Bialtu MLA H. Biakzaua chuan Khuallian nia hman-puiin item chi hrang hrang entir a ni a, Vawiin hian chhunzawm leh a ni dawn a ni.

P&E Department-a hnathawkte pawl, P&E Engineering Officers’ Association (PEOA) Annual General Conference chu nimin khan Aijal Club-ah neih niin P&E Minister R. Lalzirliana chuan a hmanpui a, Kawlphetha MW 3 pechhuak thei tur Kawlbem SHP chu hawn mai theih tura peihfel thawkhat a nih tawh thu P&E Minister hian a sawi a ni.

Mizoram People Forum (MPF) Annual General Meeting vawi 15-na chu nimin khan Vanapa Hall, Aizawl-ah neih a ni a, MPF General Headquarters atanga Local Forum thlenga Kohhran pakhat kaihhruaina anga ngaih theiha a kal chu siamthat ngai ti an tam avangin, Kohhran pawl hrang hrangte kokim zawka MPF-a an inhman theihna atan Dan Bu siamrem rawtna an pawm a. “Governing Board-in lo zut mam se, hman theih turin tichhuak se,” an ti a ni. He hunah hian Serchhip atang pawhin MPF hruaitute an tel a ni.

Nimin khan Mizoram-ah COVID-19 hri kai mi 2 chhinchhiah belh awmin hri kai zinga mi 5 te chu anmahni enkawlna hmun atanga chhuahtir an ni a, heti hian nimin tlai thleng khan hri kai enkawllai mi 15 an la awm a ni.

Administrative Training Institute (ATI) buatsaihin nimin atang khan Aizawl-a ATI Auditorium-ah ni thum chhung awh tur RTI Act hnuaia SPIO leh SAPIO te tan RTI Act 2005 chungchang zirhona chu neih tan a ni a. Ni 3 chhung he hun hman chhung hian Department tina Right to Information Act 2005 a mawh-phurtute chuan RTI rules a intuaitharna leh RTI hnanga information pekchhuah chungchangah te infuihtharna an nei dawn a. RTI kaihhnawiha an thil tawn leh hriat te sawihoin, RTI kaltlanga mipui rawngbawlna sawt zawka thawh dan tur te an sawiho dawn bawk a ni. Hei bakah hian Department Website-a Suo Motu disclosure update that a pawimawhna leh website-a Department hmalakna chungchang te sawi a ni bawk.

National Green Tribunal, Eastern Bench chuan Zobawk, Lunglei-a Sports Academy siam mek chu tawp rih turin Mizoram sawrkar a hriattir.

Nimin khan Chief Minister Zoramthanga hovin Council of Minister thutkhawm chu CM Office Cabinet Meeting Room-ah neih a ni.

Mizoram-a rawn zin Union Minister of State for Environment, Forests and Climate Change Ashwini Kumar Choubey hovin nimin tlai khan EF&CC Minister TJ. Lalnuntluanga, Forest Department leh Mizoram Polution Control Board hotute chuan thutkhawm an nei.

Nimin khan MNF East Block Serchhip chuan Serchhip Venglai-a Mizo Hnam Run-ah Office Bearers 2022-2024 thutkhawm hmasa ber an President H. Lalthianghlima kaihhruai in an nei a, kum 2023 Inthlanpui hmachhawn tura an Party inbuatsaih dan tur leh hmalak dan turte huam zau taka sawiho niin he hun hi MNF General Hqrs. atanga Serchhip bial viltu J. Malsawmzuala Vanchhawng pawhin a telpui a ni.

Chhiatrupna a lo thlen thulha chhanchhuah leh chhawmdawl hna thawh dan a tak anga entirna hun, Disaster Mock Drill chu Vawiin hian Serchhip-ah neih a ni dawn a, hemi atana lo inbuatsaih dan leh lo enlawkna hun, Table Top Excercise chu nimin khan Serchhip DC Meeting Hall-ah neih a ni.

Serchhip Leisekawt Mual-a India Eastern Territory Salvation Army Youth (SAY) Congress vawi 26-na chu zawhfel a nih hnuah nimin khan he Congress neihna atana hman Pandal chu thiah hnatlang neih nghal a ni a, nimin khan khawdang atanga he khawmpui hmang tura rawn kal mi thahnem tak nen hnatlang mi 200 vel zet an thawkchhuak a, Pandal cheina leh thil pawimawh hrang hrangte tihfel thawkhat nghal niin Pandal Structure thiah hna erawh a hmaa a sak hna thawktu ten an thawk leh nghal dawn a. Hei vang hian nimin khan Pandal tha hna hi a tlangpui chu zawhfel nghal niin hnatlang a thawkchhuak te chungah Salvation Army hotute chuan lawmthu an sawi a ni.

Serchhip-a District Transport Officer (DTO) Office building sak thar chu mipui dawr theih tura luah a nih hnuah tunkar Ningani khian hawn a ni dawn.

MJA Serchhip District ten Governor hnena Bharat Broadband Network Limited chung-chang an lo thlen ah Mizoram Governor chuan hma a la zui nghal.

MNF Vice President Lalthlengliana chuan nimin khan Aizawl-a Mizo Hnam Run-a inkhawm ah thu sawiin tunhnaiah Congress in an ngum khak hmu lovin sum harsatna chungchangah an bei nia sawiin, “An hunlai khan sawrkarin sum a neih loh avangin Treasury vawi 30 chuang an khar,” a ti a. Sum an harsat avangin kum 2012-2015 chhung khan RBI atangin cheng vbc. 1331.61 lai an puk niin a sawi bawk.

Mizo Zirlai Pawl (MZP) chuan Bangladesh-a cheng Zohnahthlak kan unauten, Bangladesh Army leh Arakan Army (AA) te vanga harsatna nasa tak an tawk mek chu pawi an tih thu an sawi a, khawvel hmun hrang hranga Zofate tana ding leh hma la thin an nih angin, Zohnahthlak unau Bangladesh-a harsatna tawk te tan MZP chu a ding zel dawn tih an sawi bawk.

Mizoram Pradesh Youth Congress Committee (MPYCC) chuan Local Council leh Village Council te hlawh thla sarih chhung (April 2022 atangin) Mizoram sawrkar in a batsak chu pawi an tih thu leh zahthlak an tih thu sawiin, a rang thei ang bera pechhuak tura Mizoram sawrkar an phut thu an sawi a. Mahni hna tuldangte kalsana khawtlang tana hnathawktute chanvo rahbeh sakna ah an ngaih thu an sawi bawk.

Kolasib bialtu MLA K. Lalrinliana chuan nimin khan Kolasib Saidan Veng-ah Health Clinic a hawng a, khawtlang hmasawnna tehfung pawimawh tak chu hriselna a nih thu leh hriselna tha nei tur chuan nu in nau a pai atanga tha taka enkawl a pawimawh thu sawiin, khawtlang hriselna tihhmasawn a nih theih nan Kolasib Assembly Constituency chhungah Health Clinic 11 hawn thar a nih thu leh a dang 10 hawn leh tura hmalak mek a nih thu a sawi bawk. Saidan Veng-ah hian In 196 awmin mihring 982 vel an cheng a, naupang kum 1 hnuailam 20 bawr vel awm anga chhut a ni bawk.

National Pharmacy Week vawi 61-na denchhenin Mizoram Pharmacists' Association chuan nimin khan DHME Conference Room, Aizawl-ah ‘Seminar on Development of Pharmaceutical Sciences in Mizoram’ buatsaihin National Pharmacy Week hawnna an nei nghal a, he hun hi Health Minister Dr. R. Lalthangliana chuan hmanpuiin damdawi hriatna lama mithiam, Pharmacist te mawhphurhna chu khawvel hmasawn zelah a pawimawh a, natna enkawl nana damdawi lei tur dik leitir chungchangah te mipuite lo puitu leh mipui hriselna atana thui tak sulsutu leh damdawi dik ei kawngah hlawk taka thawktu an nih thu a sawi bawk. He hunah hian Implementation of Pharmacy Practice Regulations, 2015 (Amendmend, 2021) chungchang sawihona neih a ni bawk.

Nimin tlai thleng khan Mizoram-ah COVID-19 hri kai enkawllai mi 18 an la awm.

All India Cooperative Week 2022 kharna chu nimin khan Cooperation Minister C. Lalrinsanga hovin Lunglei-a Art & Culture Conference Hall-ah neih a ni.