Thalaite Vocational Training leh Skill Development training tha tak kan pek a ngai - Governor

Mizoram Governor Hari Babu Kambhampati chuan State pawn leh rampawn lama hnathawh tur te kan thalai ten an thawh theih nan Vocational Training leh Skill Development training tha tak kan pek a ngai tih sawiin, rampawn-a hnathawh tur hmuh sak thei nia insawi lemchang tam tak an awm tih erawh hriat a pawimawh thu a sawi.

In lama damlo, Tar chaklo leh enkawl ngai te enkawltu tur Nightingale Care Services (Home Healthcare) training hawnna nimin-a Jay Jay Training & Placement Solutions, Falkland Veng, Aizawl-a neih a hmanpuina ah he thu hi sawiin Governor Hari Babu Kambhampati chuan Jay Jay TPS in kum 10 chhunga hma alo lak tawhna ah thalai tam takin ram chhungah leh ram pawnah hna an hmuh theih phah tih sawiin, hei hi thil lawmawm tak a nih thu a sawi a. Helam hawi zawng hian LESDE leh a training partner dang te pawhin Skill Training Course dang te pawh siam belh zel se thalai tam takin eizawnna an neih phah dawn a ni, a ti. Governo chuan sawrkar hnathawh tur chu tlem te a ni tih sawiin, “Kumtin thalai lehkhathiam an awm belh zel a, eizawnna kawng dapin hnathawh tur an mamawh a. Mizoram-ah ringawt hnathawh tur zawng loa State pawn leh ram pawn lama hnathawh tur tam tak awm mek te kan thalaite an ngaihven a hun tawh a. Heng State pawn leh rampawn lama hnathawh tur te hi kan thalai ten an thawh theih nan Vocational Training leh Skill Development Training tha tak kan pek a ngai a ni,” a ti a ni.

Governor chuan rampawn-a hnathawh tur zawngte hnena hna hmuh sak thei nia insawi, lemchang tam tam tak an awm tih erawh hriat a pawimawh takzet tih sawiin, “Heng Fake Agency te hi awihawm takin an insawi thin avangin mi tam takin bum tawkin harsatna an tawh phah tawh a. Hna zawng te chuan Fake Placement Agency te thangkam-ah an awh lohna turin Hna pe thei nia insawi nazawng te chu ring nghal mai lo a an zirchian hmasak thin a ngai a. A tha berah erawh chuan sawrkarin a pawmpui Agency ngei pan a tha,” a ti a. Mizoram-ah pawh rampawna hnathawh tur zawnsak thei awmchhun leh Ministry of External Affairs in license a pek thlap Jay Jay TPS a awm chu thil lawmawm tak a ni tih sawiin, Jay Jay TPS hotute pawh theihtawp chhuah chhunzawm a, Skill Training dang te pawh mamawh dan mil zela siam belh turin a chah bawk.

Nimin-a he hun hmanna ah hian Jay Jay TPS Manager D.Eich Thanga chuan an training dan report pein Jervis Nghaka Chhak-chhuak, Proprietor, Jay Jay TPS chuan Jay Jay TPS hmachhawp leh training dang an kalpui tum chungchang te a sawi a. Governor hian Nightingale Care Services (Home Healthcare) hnuaia training Batch hmasa ber te hnenah Certificate a hlan nghal a ni.

Nightingale Care Services (Home Healthcare) training hi thla thum chhung neih niin North Eastern Council (NEC) hnuaia hmalakna a ni a. He Training Course hi Indian Institute of Entrepreneurship (IIE) duan niin Certificate pawh hi IEE pek a ni a. Batch hmasa ber-ah hian mi 26 ten hlawhtling takin training an nei a. Heng zinga a tam zawk hi rampawn - UK, Singapore, Gulf leh hmundang ah te Healthcare Giver hna hmu tawhin an kalna tur buaipui mek an ni a. Batch 2-na ah mi 21 awm mekin nakum January-ah Batch 3-na atan admission hawn a ni leh dawn a. An hnathawh tur an zawm hnuah ei in leh awmna man chawi lovin thlatin Rs. 80,000/- bawr atangin bul an tan dawn a ni.

Jay Jay TPs hi kum 2011 khan din niin helai hmun atang hian mi 600 chuang an training chhuak tawh a. Training chhuak tawh zinga mi 400 vel hi hna hmuhsak an ni tawh bawk. Tunah hian Jay Jay TPS-ah hian zirlai 140 te Hosteller anga awmin training an nei thei tawh a ni.

Comments

Popular posts from this blog