Bangladesh atanga raltlan chungchang thlirho a ni

Kuki-Chin National Army leh Bangladesh Army te inkah avanga Bangladesh atanga Mizoram chhunga sahimna zawnga lo lutte lo tuamhlawm dan leh enkawl zui dan tur chu nimin khan Lawngtlai-ah District Bawrhsap hova sawiho a ni.

He thutkhawm Lawngtlai DC Conference Hall-a neih ah hian District Bawrhsap Amol Srivastava chuan Bangladesh atanga raltlan lo lutte chu an chanchin hriat a nih veleh District Administration atanga a tul ang ang buaipuiin, anmahni chhawmdawlna tur ngaihtuah nghal a nih thu a sawi a, sawrkar lam atangin theih tawpa ngaihven zui zel an nih thu a sawi a. Sahimna zawnga ram chhunga lo lutte chu a hnam ang zawnga lo thliar lova, mahni mihringpui harsatna tawkte tanpui duhna rilru atanga lo dawnsawn a pawimawh thu a sawi bawk a. District Administration leh raltlan chhawmdawlna kawnga hmalatu pawl hrang hrangte inkarah inhriat pawhna tha a awm theihna tura thutkhawm hi neih a nih thu a sawi bawk.

Raltlan chungchanga Nodal Officer, Lawngtlai Sub-Divisional Officer (Sadar) TT. Beikhaizi chuan Bangladesh atanga raltlan lo lutte dinhmun tlangpui leh District Administration atanga chhawmdawlna an pek tawh dan te tarlangin, State sawrkar lama mamawh hrang hrang an thlen belh thu a sawi a. Hemi hnu hian Lawngtlai District chhunga Bangladesh atanga raltlan awm mekte leh lo la thlen belh turte chhawmdawl leh enkawl zui dan turte sawiho zui a ni.

Thuneitute'n an chhinchhiah danin, tun dinhmunah Lawngtlai District chhungah Bangladesh atanga raltlan lo lut mi 293 awn mekin an zinga 132 chu mipa niin hmeichhia 161 an ni a. An zinga mi 145 chu kum 18 chunglam niin, kum 18 hnuai lam mi 148 an awm bawk a ni. Bangla-desh-a buaina hi la kal mek a nih avangin raltlan lo luh belh an awm thulha lo inhmakhua lawk nan raltlante lo dah lailawkna hmun atana rawtna te he thutkhawm ah hian thlirho a ni bawk.

Raltlante hi Parva-III a Community Hall, Primary School, Health Sub-Centre, Anganwadi Centre leh High School building-ah te riahna leh khawsakna tur ruahmansak lailawk an ni a. District Administration atangin ngun taka vil reng niin, ei leh in, mutbu leh ni tin mamawh zualpui engemaw zat pek a ni a. Police lamin sSecurity thilah vil reng bawkin, Health Department atangin damdawi mamawh pek an nih bakah Health Clinic te buatsaihsak an ni a. CYLA leh tlawmngai pawl dang atangin a hmuna kal chilha chhawmdawlna pek an nih bakah Kohhran leh mimal atang pawhin chhawmdawlna kawnga hmalak a nih thu he thutkhawmah hian tarlan a ni bawk.

Comments

Popular posts from this blog