Mizoram-a zirna kalpui mekah Vocational Education leh Skill Development inzirtir uar a ngai - Governor

Mizoram Governor Haribabu Kambhampati chuan Mizoram-a zirna kan kalpui laiah eizawnna nena inkaihhnawih thil a hranpaa zirtirna a tam lo tih sawiin, Vocational Education leh Skill Development inzirtir uar a ngai tih a sawi.

Mizoram-a Private University awmchhun, ICFAI University Mizoram in nimin-a Convocation vawi 10-na an Campus Auditorium-a an buatsaih a hmanpuina ah he thu hi sawiin Governor chuan Mizoram-a zirna kan kalpui laiah Art Subject lam leh Subject tluangtlam lam zirtirna, tuna kan kalpui mekah tha thawkhat mah ila, hmasawnna zawng zawh tur leh chhawrtlak mithiam chherchhuak tur erawh chuan duhthu a sam tawh lo tih sawiin, “A tam thei ang berin Vocational Education leh Skill Development lam te kan zirlai te kan zirtir a ngai tawh a. Hna zawng tura zirtirna pek lam aiin midangte chhawr thei tura mithiam, mahni kutke-a bultan thei leh an hlawhtlin tak tak hma atanga midang te tana hna thawh tur siam thei mi tam zawk chherchhuah kan tum tur a ni,” a ti a. Mizoram thalaite chu a tlangpuiin saptawng an thiamin an tawng pawh a nalh tih sawiin, “Hei hi Skill pawimawh tak a ni a. India ram mai ni lo, ram pawnah thleng Mizo thalaite hian hna an hmu thei a; engemaw thiam bik emaw, thawh theih bik erawh an neih a ngai a, hemi atan hian Skill Development lam leh Vocational Education lam kan hawi nasat a ngai a ni,” a ti bawk.

He hunah hian Governor chuan Mizoram-ah Central Scheme tha tak tak dawngte an tlem chhan chu heng Scheme hrang hrang te chungchangah inzirtirna pekchhuah a that tawk loh vang a ni tih a sawi a. Hei hi pawi a tih thu te, hun remchang a neih apiangin hemi chungchang ah sawrkar Official leh Banker te tang tura a ngen thin thu a sawi a. Central sawrkar atanga dawn theih Social Security Scheme tha tak tak leh sawrkar tanpuina te chu a dawng tur dik tak, la dawng lo tam tak ten an dawn theihna turin mithiam rawn chhuak thar te pawhin hriatchian an tum a, beneficiary te hnenah zirtirna an pek a ngai tih a sawi bawk.

He hunah hian ICFAI Mizoram Vice Chancellor Prof R.P. Vadhera chuan report pein ICFAI University Mizoram hi ICFAI Society, Hyderabad chuan tihlen zel a tum a, tunah hian PG Program 10 (MBA, MSW, M.Com, MA Pol. Sci., MA Eng., MA Edn., MA Hist., M.Sc. Geog, MA Eco., MA Mizo & Cultural Studies) leh UG program 7 (BBA, BSW, BCA, B.Com, BBA-H & T, BA (Eng), BA (Geog)) te chu Faculty of Management, Faculty of IT leh Faculty of Humanities & Social Sciences hnuaiah kalpui mek a ni.

ICFAI University Mizoram Convocation-ah hian Chancellor Prof. YR. Haragopal Reddy pawhin he University hmasawn zelna tur hian a theihtawp a chhuah zel dawn tih a sawi a, Degree thar nei te chu ICFAI Mizoram tana palai hna thawktu ni chhunzawma he University hmasawn zelna atana mi tangkai ni turin a sawm bawk.

ICFAI Mizoram atang hian kumtin Graduate 250-300 an chhuak thin a, kuminah erawh Graduate 98( 75 PG & 23 UG) chiah an awm a. Hei hi kum 2019-22 UG Program leh 2020-22 Batch PG Programs-a admission la an tlem vang a ni a. Tunah hian ICFAI University Mizoram-ah hian admission la rawn tam leh tawhin zirlai 618 an awm mek a ni.

Nimin-a he hun hmanna ah hian zirlai titha zual lawmman Gold Medal dawngtu 14 leh Silver Medal dawngtu 13 an awm bawk a ni.

Comments

Popular posts from this blog

Tukverh-a tlasual boral