Latest News

Seat 40 awmna Mizoram Assembly-ah ZPM in seat 27 lain sawrkar thar an siam dawn

Image
Kum 2023 Mizoram State Assembly Inthlanpui-a Vote tla te chu nimin khan chhiar a ni ta a, Seat 40 awmna ah Zoram Peoples Movement (ZPM) chuan Seat 27 lain Party mal-a sawrkar siam thei turin hnehna an chang a, Rorellai MNF Party chuan Seat 10 lain Chief Minister leh Minister nilai engemaw zat an tling zo lo a ni.

ZORO in hma la turin Mizoram sawrkar ngen

Zo-Reunification Organisation (ZORO) chuan Bangladesh-a awm Zohnahthlak te harsatna tawh mekah a theih anga hma la turin Mizoram sawrkar chu an ngen.

Inrinni-a Aizawl Press Club-a thuthar thehdarhtute an kawmna ah ZORO General Hqrs. hruaitute chuan Bang-ladesh-a Zohnahthlakte chuan an sahimn atan leh anmahni puala State demand-in Kuki-Chin National Army (KNA) dinin an theih tawka hma an lak thu leh an Tribal puite lakah pawh dodalna nasa tak an tawh hnuah tunhnai mai khan Bangladesh Sawrkar Sipai te chu Arakan Army (AA) te nen inremna siamin Bangladesh Army leh Arakan Army te tangrual chuan KNA te chu Chaihkhiang khua leh a chhehvelah kapin nasa takin an inbei a, civilian pawi sawi lo te pawh dim hauh lovin nunaute an nghaisa niin an sawi a. Tunah hian Bangladesh-a kan Zohnah-thlak unaute chuan harsatna namenlo tawkin an khuaah pawh awm ngam lovin an tlandarh mek tih ZORO hruaitute chuan an sawi a, “Bangladesh kan unau, kan thisen zawmpui ten nasa taka harsatna an tawk tih ZORO in a hriatin pawi a ti hle a, kan tawrhpui takzet a ni,” an ti.

Hetiang hi thil awmdan a nih avangin Bangladesh-a kan Zohnahthlak unaute hi din-hmun derthawng takah an ding mek tih ZORO hruaitute chuan sawiin, Mizoram sawrkar chu heng Bangladesh-a awm Zohnahthlak te harsatna hi a theih ang anga ngaihtuah a, hma la turin an ngen a, “Kan NGO pui pawl hrang hrang te pawh bengchhi a, a theihna apianga lo tanpui turin kan ngen a. Mizoram mipuite pawh kan unau Bangladesh a mi ten harsatna an tawk tih hriaa tawngtaipui turin kan in sawm nghal a ni,” an ti bawk.

Comments

Popular News (Last 30 Days)