ZPM goal - Kalphung thar a mipui sawrkar siam

ZPM Vice President Dr. Kenneth Chawngliana chuan, “Kan goal chu kalphung thar hmanga mipui sawrkar siam a ni,” a ti.

Nimin-a ZPM Chhung Inkhawm Aizawl-a an Party Office-a neih ah ZPM Vice President chuan, “ZPM hian thil pathum kan zuar a; chungte chu kan goal, kan Policy leh kan Leader te an ni,” tiin “Kan goal chu kalphung thar hmanga mipui sawrkar siam a ni. Kalphung thar ziarang pawimawh tak tak te chu; party hi mi pakhata thuneihna burbun lova thuneihna intawm (collective leadership) hmanga kaihhruai te, mi pakhat term hnih bak Chief Minister an ni thei lovang tih te, CM-in Works department a khawih lovang tih te, Val Upa Council (VUC) uapna hnuaia party leh sawrkar kalpui te, dan rorelna (rule of law) tundin te, langtlang (transparent) sawrkar siam te a ni,” a ti a. “Eng dan berin nge kan kal tih pawh hriatthiam har khawpa kan ram hmaibal hi tihfai kan tum dawn a, a pui berah chuan mi rethei zawk ten hma nan sawn theihna turin ZPM chuan hma a la dawn a ni,” a ti a. “Tunlai hian Mizoram a sawrkar siam tum lova campaign an awm a, tu te nge an nih kan hria a, heng mite hi ZPM zara sawrkar-a tel tum an ni tih mipuiten hria se kan duh a, ZPM hian a malin mipui sawrkar tha tak siam a tum a ni,” a ti bawk.

ZPM Vice President Dr, Kenneth Chawngliana chuan an policy an tlangzarh tawh SDRP chu lo zirchiang tura Zoram mipuite chahin, “Goal leh policy eng anga tha nei mah ila, hruaitu tha kan neih loh chuan kan tum ram kan thleng thei lovang. Mi bik, chawimawi hlawh, mahni tuma chiang, eiru lo bera thlan chhuah, sawrkar kalhmang hria leh Assembly rorel thiam Leader, Pu Lalduhoma kan nei hi kan vannei hle a ni,” a ti  bawk.