Latest News

Nungcha humhalh turin ngen

Serchhip District Honorary Wildlife Warden RL. Chhuanawma chuan ramsa leh nungcha te humhalh turin mipuite a ngen.

District Honorary Widlife Warden chuan tunlai hian Bawngchawm Tlang velah Hauhuk a awm nia hriat a nih thu sawiin, mipuite chu humhalh turin a ngen a. Hei bakah hian nungcha dang Ramar, Vahrit leh a dangte Silai leh thildang hmanga veh leh tihhlum ching an awm nia hriat a nih thu pawh sawiin, Ramsa leh nungchate dimdawi leh humhalh tlat turin mitinte a ngen tih a sawi a. Dan bawh-chhia te chu Wildlife (Protection) Act, 1972 Schedule II (1) hmanga hrem theih an nih thu leh pawisa Rs. 25,000 chawitir leh kum 3 thleng lungin tantir theih an nih thu a sawi bawk.

Hetihlai hian Serchhip Chhim Veng Village Council chuan an huamchhung, Bawngchawm ram-ah Hauhuk nupa a awm nia hriat a nih thu leh heng Hauhuk bakah nungcha dang awm te chu humhalh tlat a ni tih an sawi a. Tihnat emaw, tihhlum emaw phal a nih loh thu sawiin, lo ti lui an awm a nih chuan thuneitute hnenah thlen an nih tur thu an sawi bawk a ni.

Comments

Popular News (Last 30 Days)