Serchhip-ah 'Zoram Harh Rawh-Campaign' pualin Mizo Hnam Lam leh Pipu zai-ah intihsiakna neih a ni

Central YMA leh Mizoram State AIDS Control Society (MSACS) te thawhdunna 'Zoram Harh Rawh-Campaign' neih mekah nimin khan Serchhip-ah YMA Branch te tan Mizo Hnam Lam leh Pipu zai hmanga inelna neih a ni a, he hun hi District Bawrhsap Nazuk Kumar IAS chuan a hmanpui a ni.

Serchhip District Level Organising Committee on 'Zoram Harh Rawh-Campaign' buatsaiha Mizo Hnam Lam leh Pipu Zai intihsiakna hi Serchhip Auditorium-ah neih a ni a, he hun hmanpuitu District Bawrhsap leh Organising Committee Chairman ni bawk Nazuk Kumar chuan he Campaign hi kan hnam ziarang pholang thei Zai leh Lam te thangthar lo awm zel tur ten an hriatreng theihna tur leh a humhalhna atana tih a nih bakah kan nunphung min tibuai em em tu pakhat HIV/AIDS laka kan him theihna tura inzirtirna hun atana buatsaih a nih thu a sawi a. India ram State hrang hrang zingah Mizoram chu HIV/AIDS vei tamna anih avangin a invenna kawngah tan lak nasat a tul hle nia a hriat thu a sawi a. HIV/AIDS vei an awmloh nan India ramah nasa taka hma lak mek a ni tih pawh sawiin, Mizoram chhunga hemi kawnga hmalakna pawhin rah tha a chhuah zel tih report atanga a lan thu leh HIV/AIDS dona tura MSACS in YMA a thawhpui chu a lawmawm hle tih a sawi a, Serchhip-ah pawh Sub-Hqrs. YMA te nen thawkho a HIV/AIDS dona tura hun pawimawh tak hman a ni thei chu lawmawm a tih thu a sawi bawk.

Serchhip District Bawrhsap chuan zirchianna atanga a lan danin Mizoram mipui zawng zawng atanga chhutin za zela 2.3 vel zetin HIV/AIDS an vei anga chhut a nih thu leh hei hi a sang hle tih sawiin, a dona kawngah mitin kan tanrual a ngai tih a sawi a, mitin te kan tanrual theihna turin he hun hi buatsaih a nih thu pawh sawiin, he intihsiakna a Branch YMA tel zawng zawng te chu duhsakna a hlan bawk.

'Zoram Harh Rawh-Campaign' kaltlanga Serchhip Sub-Hqrs. YMA huamchhunga Branch YMA te tana Mizo Hnam Lam leh Pipu Zai hmanga intihsiakna hawnna hun hi Serchhip Sub-Hqrs. YMA President Kawlthuama’n kaihruaiin Organising Committee Secretary PC. Vanlalluna hnen atangin Report ngaihthlak a ni a, he intihsiakna ah hian Branch YMA 8 telin an zinga pahnih chu khawpui pawnlam an ni a, nimin chawhnu lam khan Cheraw leh Khuallam hmanga intihsiakna neih a ni a, nizan khan Pipu Zai hmanga intihsiakna neih leh niin lawmman semna neih nghal tura ruahman a ni.