CADS Batch hmasa berin thla 2 chhung lekin Ruihhlo cheng vbc. 28 chuang hu an man

Central YMA Ruihhlo Do Pâwl, ‘Central Anti Drugs Squad’ (CADS) 1st Batch chuan an din tirh September 9, 2022 atanga an hun tawp, Nov. 17, 2022 thleng khan Heroin (No.4) Hawng 458 zet manin ruihhlo an man chi hrang hrang hlut zawng chu Rs.28,16,48,256/- nia chhut a ni.

Central YMA in Mizoram-a ruihhlo hluar mek avanga hma la tura Ruihhlo Do Pâwl, ‘Central Anti Drugs Squad’ (CADS) a din ah 1st Batch te chuan an hun hmang zo in Zirtawpni atang khan 2nd Batch lakluh an ni a, hemi puala inkhawm Central YMA Hall, Aizawl-a neih ah CADS 1st Batch Convener leh Central YMA Finance Secretary Roneihthanga chuan September ni 9 atanga November ni 17, 2022 chhûnga CADS 1st Batch hmalâkna tarlangin, Heroin (No.4) Hawng 458 bakah TicTac 1006 (Hawng 26 hu) zet an man a, Methamphetamine mum 10,153 manin Pseudoephedrine gram 182, Tramadol mum 51200 leh Alprozolam mum 1205 an man a, heng bakah hian Ganja kg. khat leh pack 25 manin Khuh damdawi bur 3010 an man bawk a, heng ruihhlo chi hrang hrang an man hi Rs. 28,16,48,256/- hu nia chhut a ni.

Heng ruihhlo chi hrang hrang kaihhnawih ah hian mihring 490 man an ni a, mi 236 te chu Councelling pek niin Police kutah mi 2 pein Excise & Narcotics Department kutah mi 90 pek an ni bawk a, Central YMA Demand Reduction Service (DRS) kaihhruaihna hnuaiah Synod Revival Team-ten Councelling hi an pe thin a ni.

CADS 2nd Batch hruaitu leh Member te lakluhna hun hi Central YMA Vice President Lalhmachhuana chuan kaihruaiin Central YMA President R. Lalngheta chuan CADS member thar te lawmluhna hun hmangin thu a sawi a. Pathian rawngbâwltute din YMA hi Pathian in a tanpui bâng lova, kan ram leh hnam tâna ke a penna kawng hrang hrangah Pathian hian a la tanpui zel dawn a ni tih hria in, theihtawp chhuaha kan ram leh hnam damna atana huai tala ke pen turin CADS member thar te a chah a ni.

CADS 2nd Batch Convener tura ruat Central YMA Treasurer Fabian Lalfakawma pawhin a thawhpui turte chu hruaitute kaltlanga Pathian ruatte an nih avangin a phurawm hle a a hriat thu a sawi a. Ram leh Hnam tan chuan tuar a ngaih pawha tuar inhuam tur leh ruihhlo laka kan thalaite chhanchhuak turin kan theihtawp bakah tlem tal chhuah theuh turin a chah bawk. 

CADS Member tur hian Aizawl khawpui chhunga Branch YMA za chuang atangin Branch tinin member pakhat theuh an ruat a. 1st Batch-ah khan member 54 awmin 2nd Batch-ah hian member 48 an awm anga, thla hnih (November & December) chhûng atan ruat niin Zirtawpni zan atang khan an thawk tan a ni.

Comments

Popular posts from this blog

Tukverh-a tlasual boral