Union Minister in MKHC hruaitute a kawm

Union Minister of State for Minority Affairs John Barla chuan nimin khan Mizoram Kohhran Hruaitute Committee (MKHC) hruaitute chu Raj Bhavan-ah kawmin MKHC hruaitute chuan Kristian ten harsatna an tawh te an thlen.

Nimin-a an inkawmna ah hian MKHC hruaitute chuan India ramah Kristian ten harsatna an tawk mek tih sawiin, FCRA hnuaia inziaklut, Kohhran leh Kohhran hnuaia Organisation hrang hrang ten rampawn atanga tanpuina an dawn theih tawh loh thu an sawi a, hei hi an Kohhran leh Organisation anga an hnathawhna atan mamawh a nih avangin chinfel sak an duh tih an sawi a. Tunhnaiah India ram State hrang hrangah Anti-Conversion Law atangin Kristian te tihduhdah leh harsatna kawng tam takah an tawk chu tha lo an tih thu sawiin, hei hi India ram nihna - Sakhaw tan bik nei lo sawrkar (Secular State) nihphung nen inmil lo an tih thu an sawi bawk a ni. Hei bakah hian MKHC hotute chuan Assam State-ah Mizoram chhunga Kuhva thar te kaltlangpui khap a nih dan leh a chhan te sawiin, he harsatna hi a ranglama sut kian a nih theih nan hma la turin Union Minister chu an ngen bawk.

Union Minister of State John Barla chuan MKHC aiawh ten a hnena an thlen te chu a theih angin bawhzui a tum tih a sawi a. Kristian te harsatna chungchang chu Central sawrkara thuneitute Kristian pawl hrang hrang hruaitu intelkhawm ten la sawipui se tha a tih thu leh sawihona hi a awm theih nan amah pawhin theihtawp a chhuah tur thu a sawi a ni.

MKHC hotute hnenah Mizoram chhunga sawrkar hmalakna hrang hrangah Kohhran hruaitute ten mawhphurhna pawimawh tak an nei tih a lo hriat thu a sawi a. Kohhran rawngbawlna huangah hian miretheite tanpuina Scheme hrang hrang te pawh inzirtir thin ni se tun ai hian mipuiin Central Scheme tha tak tak te hi an hrechiang zawk anga, a dawngtu pawh an tam zawk a rin thu a sawi bawk.