Kum 32 chhunga leiba neih chhoh tlingkhawm leh kum 3 chhunga leiba a inzat thuak - MPCC

Mizoram Pradesh Congress Committee (MPCC) hruaitute chuan, Mizoram in State a nih kum, kum 1987 atanga kum 32 chhunga leiba a neih chhoh zel tlingkhawm leh MNF sawrkarin kum 3 chhung leka leiba a neih chu a inzat thuak tawh tih an sawi.

Nimin-a Aizawl Press Club-a thuthar thehdarhtute an kawmna ah MPCC thupuangtu Lallianchunga chuan, sum leh pai enkawlna lama MNF sawrkar an talbuai em avangin Mizoramin harsatna nasa tak a tawk mek tih a sawi a, “MNF sawrkar hnuaiah Mizoram hi leiba thang (debt trap)-ah a tang mek a ni,” a ti a. Central leh State Sawrkar sum leh pai chet vel dan muangchan avang te, ruahman lawk loh leh hriat lawk loh thil thleng a awm fo avangte leh a chhan tam tak avangin sawrkar hian leiba a nei lo thei lo tih sawiin, hmasawnna hnathawhna atana pawisa tam tham kan mamawh miau avangin kumtin a tlem tlema rulh turin sawrkarin Loan a la fo bawk tih a sawi a. Kum 2018 Congress sawrkar kum tawp thlengin Mizoram sawrkarin leiba a neih zat chu cheng vbc. 7315 a ni tih sawi bawkin, MNF sawrkar hnu kum 3 chhung lek (2019-2022) ah Mizoram leiba chu cheng vbc. 12553.08-ah a pun chhoh thu leh Congress sawrkar tlak hnuah Mizoram leiba hi cheng vbc. 6000 dawnin a pung hman niin a sawi a ni.

MPCC thupuangtu Lallianchhunga chuan MNF sawrkar hian a sum leh pai mamawh hmuh nan puk tur a hriat a piang a puk hmiah hmiah mai nia sawiin, “Open Market Borrowing (OMB) hmanga RBI atanga kumin (2022-2023)-a a puk theih zat tura bituk cheng vbc. 990 pawh a thleng tep ta, May 2022 atang khan thlatin deuhthaw, October tiam loin, Mizoram sawrkar hian OMB hmang hian RBI atangin pawisa a puk reng a. Sawrkar hnathawk hlawh pek dawn apiangin puk tur a zawng a ni ber. Sawrkar lo awm leh tur tan pawha rulh huphurhawm tak, chet ti harsa tham leiba an hnutchhiat ngei dawn a ni,” a ti bawk.

Sawrkar kum (2022-2023) kal mekah hian Mizoram sawrkar leiba rulhna atan Budget-ah cheng vbc. 1337.90 dah a nih thu leh hei hi hmasawnna hnathawh tak takna tur sum (Capital Outlay) atana an dah cheng vbc. 2663.14 zat ve hmawk a tlin thu pawh thuthar thehdarhtute hnenah hian sawiin, “A actual-ah chuan leiba rulhna atan hei aia tam hi an hman a ngai ang. Kum 2020-2021 ah pawh khan Capital Outlay-ah cheng vbc. 1125.97 an dah laiin, a aia tam daih cheng vbc. 1617.89 chu leiba rulh nan an hmang a ni,” a ti a. Tawngkam thiamna ringawtin ram min hruai tha lo tih hi Mizoram mipuiin a takin kan hre mek niin a sawi bawk.

Comments

Popular posts from this blog

Tukverh-a tlasual boral