Zirlai 96% ten Tribal Scholarship dawng tawh

Kum 2021-22 atana Tribal Scholarship (Pre & Post matric) atan Rs. 36,43,48,530/- ruahman a ni a, a dawngtu tur zirlai zaa 96 (96%) pek an ni tawh a. Technical problem vanga la dawng loten an dawn thuai theih nan Mizoram Scholarship Board (MSB) chuan hma a la mek.

MSB hotute sawi danin sawrkar laipui-a Ministry of Tribal Affairs atangin kum liam ta, 2021-22 atan Scholarship atan hian Rs. 36,43,48,530/- ruahman niin chumi atanga zaa 10, Rs. 4,04,83,170 chu state sawrkar tum a ni a. Zawhna chhangin MSB Secretary Dr. PL. Ramliana chuan 2021-22 atana Scholarship pekchhuah mekah Technical problem vanga an la pek theih lohte tih loh chu harsatna an tawk lo tih a sawi a. Kum 2022-23 atan dilna hun hawn leh mek a nih thu te, chumi atan chuan December 9 thleng hun hawn a nih thu leh December 15 thleng dilna lutte enfiah a nih tur thu a sawi a ni. MSB Secretary chuan Scholarship dilna lutte chu uluk takin an enfiah thin tih sawiin, mi tam takin dawng thei se tih an duhsak rualin, dik taka dil nise tih chu an duh dan a nih thu a sawi. Sawrkar laipui ruahmannaah Tribal Scholarship dawng thei chinte chu kum khata Rs. 2,50,000 aia tam lo la lutte an ni.

Kum 2022-23 Scholarship atan sawrkar laipuiin central share zaa 50 (50%) cheng nuai 11,823.89 a rawn pe leh tawh a, hetihlai hian dilna hun hawn mek a la ni a, sawrkar laipui in zaa 25 dang a pek leh hnu, 75% a tlin hunah sem tan leh a ni ang a, 75% an dawn tawh sem zawh a ni tih fiahna central-a thawn a nih hnuah 25% dang Central-in a rawn pe leh ang.