Quarry chim Minister in tlawh

Maudarh khuaa ABCI Lung lakna hmun (Quarry) chim chu nimin khan Health Minister Dr. R. Lalthangliana chuan a hmunah tlawhin thil thlen dan leh hmalak zui dan te a enfiah.

Nimin-a helai hmun a tlawhna ah hian Dr. R. Lalthangliana chuan Maudarh quarry chim avanga chhiatna rapthlak tak thleng leh mi 12 laiin nunna an chan chu pawi a tih thu sawiin, chhiatna avanga thite a tawrhpui thu leh lusun chhungte a tawrhpui takzet thu a sawi a. Maudarh quarry chu Mizoram chhimlam kawng siam mek atana lung tha lakna pawimawh tak a ni tih sawrkarin a hriatpui thu sawiin, ram leilung mila fimkhur zawka hnathawh anih theih nan Geology & Mining Department mithiamte thurawn angin hmalakna kalpui anih tur thu a sawi a. Chhiat tawhna hmun zirchiangtu Geology & Mining Department Geologist te report pawh sawrkarah thehluh anih tawh thu leh hmalak zel dan tur chipchiar zawka enfiah turin Director hovin Department thawktute an kal leh tur thu pawh a sawi a. Chhanchhuahna leh a tul ang thawktu hrang hrangte thawhrimna leh inpekna avangin an chungah lawmthu a sawi bawk.

Maudarh Stone Quarry, Leite ram, Hnahthial District hi tun thla ni 14 tlai lamah khan chim thutin, ABCI Infra Pvt. Ltd. leh GP Project hnathawktu mi 12 lai chu leimin hian a delh a. He Stone quarry hi C. Lalremruata, Leite hminga March 5, 2020-a Mining Permit pek a ni a, NHIDCL hnuaia Contractor ABCI Infra Pvt. Ltd.; NH-54 166.00 km to 208 km (Package 4) kawng siamtu nen inremna (agreement) siamin August 31, 2020 thleng nungin an dil angin Mining permit hi July 31, 2023 thleng pawhsei a ni a. He quarry license hi Nov. 17, 2022 atang khan chawlh lailawk tir (suspend) rih a ni bawk.