Thu zawhfiahna turin Lie Detector hmang dawn

Kumin September, 2022-a Aizawl Zonuam Veng-a hmeichhe naupang pakhat pawngsual ni ngeia Doctor-te'n an hriat kaihhnawiha man, naute nu leh pate chu Polygraph Tests (Lie detector) hmangin thu zawhfiah an ni dawn.

Nimin-a a Office-a thuthar thehdarhtute a kawmna ah zawhna chhangin Aizawl SP C. Lalruaia chuan, naute nu leh pa te Lie detector hmanga thu zawhfiah an ni dawn thu hi sawiin, Mizoram in Lie detector kan neih loh vangin Delhi-a Central Forensic Laboratory atangin mithiam pathum an lokal dawn tih a sawi a. Heng mi te rawn kalna tur Thlawhna ticket pawh ruahman ni tawhin, thu an zawhfiah ni tur pawh tihfel a ni tawh a, chumi atan chuan Court atangin phalna pawh neih a ni tawh bawk. He naupang pawngsual ni ngeia hriat chungchangah hian naute nu leh pa te chu Police te chuan la tawhin an kutah engemawchen an awm hnuah pawngsualtu finfiah theihna tur thu hriat an nei lo a, chumi hnuah Judicial Custody-ah lak niin, tun dinhmunah bail-a chhuah lailawk tir an ni thung.

Aizawl SP chuan kumin Krismas leh kumthar vuakvet ah halpuah leh halmawi hal khapna Dan khauh takin an kengkawh dawn tih sawiin, Dan zawmlo te Police a report zung zung zel turin mipuite a chah a. Nikum Krismas leh kumin kumthar vuakvet ah halpuah leh halmawi khapna dan bawhchhiat chungchangah thubuai 23 ziahluh an nei a, chung zinga thubuai 18 te chu chinfel tawh niin thubuai ngaihtuah mek 5 a la awm a. Mi man 26 man nei bawkin, an zinga mi 19 te chu halpuah leh halmawi neitu/zuar niin, midang 7 te chu a hmangtu/haltu an ni a. Halpuah leh halmawi an man hi Rs. 2,00,375/- hu zet a tling bawk.