Finance enkawltu Chief Minister Zoramthanga MNF Thalai ten an chhuan thu an sawi

MNF Thalaite chuan Finance enkawltu Chief Minister Zoramthanga chu an chhuang hle tih an sawi.

Inrinni kaltaa Aizawl Press Club-a thuthar thehdarhtute an kawmna ah MNF Thalaite chuan Congress sawrkar-in leiba tamtak a hnutchhiah chung leh, COVID-19 hri leng in nasa taka min tibuai chung pawhin Chief Minister leh Finance changtu Zoramthanga chuan ram sum leh pai dinhmun siamtha turin theihtawp a chhuah tih sawiin, a hmalakna zarah Mizoram leiba pawh nasa takin a tlahniam tawh niin an sawi a. Mizoram sawrkar in sum leh pai inrelbawlna ah hun khirh tak a tawk chung pawhin Mizoram leiba a tlahniam zel mai te chu lawmawm an tih thu sawiin, “Sawrkar hmasa hunlai anga ‘Sum Lapse’ sawi thawm awm ta lo te, Financial Year tawp dawn a hnawhsarum taka zân khawtairek thlenga sum tam tak hmanral tum thinna tihbo a ni chho ta te, Mizoram in sum leh pai-ah harsatna vawrtawp a tawh lai pawha sawrkar hnathawkte hlawh chatlak awm hauhlo-a ala pe thei zel te leh Treasury khar ngailo a min hruaithei te hi Finance Minister-in ram sum leh pai a enkawl thiamzia lantirtu a nih avangin Finance enkawltu Chief Minister Pu Zoramthanga hi MNF thalaite chuan kan chhuang hle a ni,” an ti.

MNF Thalaite chuan Nov. 17, 2022-a MPCC hotu ten Press Conference ko in sawrkar leiba hmanga Zoram mipuite rilru hruaikawi an tum ni ngeia ngaih theih thu an puan thu pawh he hunah hian sawiin, Central sawrkar leh State/UT sawrkar te hian sawrkar inrelbawlna kawngah leiba an nei vek tih sawiin, Reserved Bank of India (RBI) Website in a tarlan danin Central sawrkar hian cheng vbc. 1,45,72,956 zet mai June, 2022 khan a nei mek tih an sawi a. MPCC in MNF sawrkar kum thum chhunga leiba cheng vbc. 12553.08 a pungchho ta anga an tarlan chu data an neihna zawtin, “Kan data hmuh theih zawng zawng atang chuan tuilet hnuah Mizoram leiba hi cheng vbc. 12553.08 a la tling ngai lo hrim hrim a ni,” an ti a. Mizoram chu India hmarchhak State zingah phei chuan a pawisa fai a ni emaw, a GSDP % a ni emaw kum 6 chhung data an neih atangin Sikkim tih lohah chuan leiba nei tlem ber kan ni zawk niin an sawi a. “Congress sawrkar-in GSDP % anga leiba 38.9% a hnutchhiah kha kum thum chhung MNF sawrkar hian 31.2% ah a tihniam hman zawk hial a ni. Kan unau MPCC te data sawichhuah duhdan hi thudiklo hmanga ram mipui rilru hruaikawi tumna ni ngei a kan ngaih avangin Zoram mipui hma ah thupha chawi ngei turin MNF Thalaite chuan kan phut a ni,” an ti bawk.