MADC-ah BJP leh MNF intawm sawrkar siam dawn

Mara Autonomous District Council (MADC)-a Congress leh MNF sawrkar intawm paihthlak a nih hnuah Party mal-a Seat ngah ber BJP chuan MNF nen sawrkar aan siam dawn ta niin a lang.

MADC thutkhawm Zirtawpni-a neih ah H. Malvina kaihhruai Congress leh MNF sawrkar intawm chuan sawrkar rintawk lohna Motion a paltlang zawh tak loh avangin sawrkar thar a ding dawn ta a, Congress leh MNF intawm MADC sawrkar atanga inhnukdawk ta MNF MDC-te leh BJP MDC-te chuan BJP-MNF Coordination Committee dinin an hruaitu atan Siaha District BJP President leh Tokolo Bial atanga tlantlin M. Laikaw chu an thlang a. Deputy Leader atan Siaha South -II atanga MDC-a thlan N. Viakhu (MNF) an thlang bawk a. M. Laikaw hi Chief Executive Member (CEM) tur atan thlan a niin Governor pawmpuina nghah mek a ni a, Deputy Leader N. Viakhu hi MADC Chairman atan thlan nawn leh tura ruahman a ni bawk. Tarlan tawh angin Mara Autonomous District Council (MADC)-ah hian MDC seat 25 awmin BJP in seat 12, MNF in seat 9 leh INC in seat 4 an nei a ni.

MADC-a sawrkar thar din chungchangah hian Mizoram State BJP President Vanlalhmuaka chuan Inrinni khan an Office-ah chanchinbu mite kawmin Congress-MNF intawm sawrkar atanga inhnukdawk ta MNF MDC-te chu engmah nihna tiam emaw, va thlem emaw an nei lo nia sawiin, anmahni duhthlanna ngeia BJP support an nih thu leh BJP kaihhruai sawrkar nghet tak din an tum thu a sawi a. “MADC a MNF leh Congress ten an siam sawrkar hi mipui mandate nei lo, lal duh ringawt sawrkar an ni a. A hun takah MNF leh Congress te chungah Mara mipui aiawh ten huaisen takin hma an la ta a ni tih hi kan puang duh a ni,” a ti bawk.

BJP President Vanlalhmuaka chuan Chakma Autonomous District Council (CADC) chungchang pawh sawiin, “Seat 20-ah seat 20 MNF vek an nih pawhin an sawrkar na chu a nghet hlei thei lo a; tuna CADC-a MNF MDC te sawn Chakma mipui, anmahni thlang tlingtu an zah lovin, an tham lo hle a ni,” a ti bawk.

Press miten kum 2023 MLA inthlanpui ah thawhpui an neih dawn leh dawn loh zawhna chhangin BJP President Vanlalhmuaka chuan, “Keimahni a sawrkarna chang ngei turin kan bei zel dawn a, kan thei lo anih chuan sawrkarna a tel ngei turin tan kan la dawn a ni,” a ti a. Mizorama political party zingah Congress tih loh chu an thawhpui thei vek nia sawiin, thutlukna erawh an party thuneitu sang kuta awm niin a sawi bawk.