Serchhip-a neih SAY Congress vawi 26-na a tiak ta
India hmarchhak leh North Bengal thleng huamtu India Eastern Territory Salvation Army Youth Congress vawi 26-na hi Zirtawpni zan atang khan Leisekawt Mual-a Pandal-ah neih niin nimin thleng khan hmun hrang hrang atangin lehlang-a he khawmpui rawn chhim hi an awm a, Palai rawn kal zawng zawng hi mi 4500 vel tlinga ngaih a ni a, nimin chawhma lam Thianghlimna Inkhawm neih ah Speaker Col. Lalhmingliana Territorial Commander IET hnen atangin thuchah ngaihthlak a ni a, nimin chawhnu lamah Pathian biak inkhawm nei zuiin nizan khan Palai thlahna inkhawm neih a ni a, nimin inkhawm hi bialtu MLA Lalduhoma pawhin a rawn hmanpui a ni.
India Eastern Territory Salvation Army Youth Congress hi kum 1954 khan Saitual-ah neih tan niin a tir lamah hunbi mumal tak neia hman a ni lo a, kum 1984 atang khan mumal deuh zawkin kum 3 danah neih a ni a, kumin a neih a vawi 26-na hi ruahmanna hmasa ah chuan kum 2020-a neih tur kha niin hri leng avanga neih theih a nih tak loh avangin kumin hian neih a ni ta zawk a ni.
Salvation Army India Eastern Territory huamchhungah hian Division 7 awmin Central North Division, Central South Division, Southern Division, Western Division, Eastern Division, Northern Division leh Himalayan Division te an ni a, District pakhat, Tripura District a awm bawk a, heng ah hian Corps 245 awmin Society 108 a awm bakah Outpost 40 a awm a, SAY Member 12,871 an awm mek bawk.
Comments
Post a Comment