Serchhip District Level NCORD Committee in ruihhlo dona kawnga hmalakna an thlirho

Nimin khan Serchhip-ah District Level Narco Coordination Centre (NCORD) Committee thutkhawm neih niin ruihhlo dona kawnga hmalakna leh hmalak zel dan tur hrang hrang sawiho a ni a. Kumin chhungin Serchhip Police te leh Excise & Narcotics Department te chuan Heroin No. 4 tam tham tak an man tawh a ni.

Sawrkar laipui ruahmanna anga din District Level Narco Coordination Centre (NCORD) Committee thutkhawm Serchhip DC Meeting Hall-a neih hi Serchhip Addl. DC Lalmuansanga Ralte chuan kaihruaiin ruihhlo hluar mek doletna kawngah Serchhip District-a Police leh Excise & Narcotics Department bakah khawtlang anga tanrual a tul thu a sawi a, kan hma lawka Krismas leh kumthar vuakvet lo thleng turah pawh ngawrh lehzuala Duty insiam a pawimawh thu pawh sawiin, ruihhlo dona kawnga thawktu hrang hrang ten pheikhai rual taka hma an lak tlan a tul thu a sawi bawk.

He hunah hian Serchhip Addl. SP Saidingliana Sailo chuan kumin September thlaa District Level NCORD Committee thutkhawm an neih hnuah Serchhip Police ten zirna In pasarih (7)-ah Legal Awareness Campaign leh ruihhlo laka inthiarfihlim tura Signature Campaign an neih tawh thu sawiin, Sept. 27 leh Nov. 25, 2022 inkar chhungin Heroin No. 4 tum thum an man thu a sawi a, ruihhlo an man zawng zawng hi Hawng 15 chuang niin gram 183.98 a rit a nih thu leh Serchhip Police Station-ah thubuai pathum ziaklutin mi 5 man an nih thu a sawi a, an ruihhlo man te hi Rs. 91,99,000/- hu a nih thu a sawi bawk.

Serchhip-a Excise & Narcotics Department-a SI, B. Lalengmawia pawhin ruihhlo dona kawngah theihtawp chhuaha hma an lak thu sawiin, kumin chhungin Heroin No. 4 pawh kg. 1.22 bakah Ganja kg. 69 an man tawh thu a sawi a, heng bakah hian Codeine Phosphate bur 9 an man tawh thu sawiin, heng kaihhhnawih ah hian ND&PS Act hnuaiah thubuai 55 ziaklutin mi mi 68 an man tawh thu a sawi a. Serchhip District-ah ruihhlo ngawlvei mi 450 chuang zet an awm nia chhinchhiah a nih thu a sawi bawk.

He thutkhawm ah hian North Vanlai-phai DFO C. Lalkhawthanga pawhin an Department in Khawlailung-ah Check Gate an neih thu sawiin, an Gate-ah hian ruihhlo leh Dan phalloh thil lakluh a awm a nih chuan man turin thawktute an in hrilh thin thu a sawi a. Education Department atanga tel PC. Vanlalluna pawhin Middle School leh Primary School-a zirlai naupangte thlengin ruihhlo-a inhnam-hnawih an awm chho thei dawn nia a lan thu sawiin, hei vang hian zirna In hrang hrangah ruihhlo la ti lo te venhim zel an nih theihna tura inzirtirna neih a pawimawh thu a sawi a. Serchhip Sub-Hqrs. YMA Anti-Drug Squad (SADS) atanga tel R. Lalhmunsiama pawhin ruihhlo dona kawnga hma an lakna te sawiin, Kohhran ten sum leh pai-a an tanpui thinna ah lawmthu a sawi bawk a ni.

Nimin-a District Level Narco Coordination Centre (NCORD) Committee thukhawm hian ruihhlo dona kawnga hmalak zel dan tur an sawiho zingah ruihhlo la ti ngai lo ten an tih lohna tura inzirtrina neih thin chu zirna In hrang hrangah neih chhunzawm zel nise an ti a, sawrkar Department te pawhin theihtawp chhuah zel se an tih bakah ruihhlo chi hrang hrang dona kawngah khawtlang tangrualin, hetiang kaih-hnawih a Dan bawhchhia hria te chuan thuneitute hnenah a rang lama hriattir thuai thin turin an ngen nghal bawk a ni.

Comments

Popular posts from this blog