NH. 54 laihzauhna atan Serchhip District-ah mi 2072 zangnadawmna pein la dawng lo 7 an awm
RTI hmanga zawhna Serchhip DC Office in an chhanna atanga a lan danin NH. 54 laihzauh leh siamthat hna thawh turah hian Serchhip District huamchhungah mi 2072 te hnenah Zangnadawmna pek ni tawhin heng mite hnena sum pekchhuah tawh zawng zawng chu Rs. 2,47,80,61,382/- a ni a, he kawng laih vanga zangnadawmna pek tur te hi pek kim la ni lovin mi 7 te hnenah pek a la ni lo a, heng mi te sum dawn tur hi Rs. 27,10,054/- a ni bawk. Heng sum la pekchhuah loh te hi ram neituten an ram pass original an thehluh loh vanga la pek loh an ni.
Hetihlai hian zangnadawmna pek tawh te hi sawrkar thuchhuak anga 15% Revenue Cess pek tel lohte pekir leh vek tura Gauhati High Court-in thupek a chhuah tawh chungchangah, 15% Cess pekkir tur hi tun dinhmunah a dawngtu turte hnenah pek chhuah a la ni lo thung a, RTI chhanna atanga a lan danin 15% Cess pek leh tur hi Serchhip District huamchhungah mi 217 awmin, an sum dawn tur zawng zawng hi Rs. 79,69,323/- a ni a, he sum pekchhuah leh turah hian October ni 3, 2022 khan Mizoram sawrkar-a GAD Under Secretary chuan Rs. 79,69,000/- chu Administrative Approval & Expenditure sanction a tichhuak a, heta tanga 15% Cess pekchhuah tur la kim lohna Rs. 323/- sanction order chu November ni 2, 2022 khan Serchhip DC chuan a tichhuak leh bawk a, Serchhip District thuneitute kutah he sum hi a awm tawh tih SPIO chuan tarlangin, he sum hi District Administration-a Other Charges Head (2053-00-093-07-00-50)-ah a dah a ni a, a dawngtu turte hnenah pekchhuah loh a la nih chhan hi Treasury-in a la pass loh vanga pekchhuah loh a nih thu leh, Treasury-in a pass hunah pek chhuah a nih tur thu SPIO chuan a tarlang bawk.
He sum chungchangah hian Serchhip Treasury Officer Alvina Ramdinthari chuan Cess hi Treasury atangin pass a ni tawh tih a sawi a, bill an pass ni hi November ni 23 emaw 24 emaw a nih mai theih nia sawiin, an bill pass hi DC Office hian RTI an chhan lai hian an la hre hman lo pawh a ni thei tih a sawi a, heti a nih chuan 15% Cess dawng turte hian an dawng thuai tura ngaih niin nimin thleng kha chuan an la dawng lo a ni.
Comments
Post a Comment