MLA inthlan a MPCC Candidate tur puan belh

Mizoram Pradesh Congress Committee (MPCC) President Lalsawta chuan kum 2023 General Election lo awm tûrah Siaha bial-a Congress Party Candidate tûr N. Chakhai MCS (Rtd) a ni tih nimin khan a puang.

Mara District Congress Committee (MDCC) General Assembly vawi 22-na nimin-a Laila Hall, College Veng, Siaha-a neih ah MPCC President Lalsawta chuan kum 2023 General Election lo awm tûrah Siaha bial-a Congress Party Candidate tûr N. Chakhai a nih thu hi puangin, a tlin ngei theih nân theihtawp lo chhuahpui a, Congress Party-in Sawrkar tha siam a tumna kawnga phur taka hma lo la tûrin Mara mipuite chu a sawm bawk a ni.

Nimin-a he hun hmanna ah hian MPCC President chuan kan ramah Neutral tam tak, Kohhran mi leh party mi tam tak kan awm tih sawiin, chung mite chuan nakum inthlan kan thlir tih a sawi a. “Nakum inthlan turah Congress Party chuan hautak lo takin, ram tana hnathawk thei tur, mi tling ngei tur Candidate kan chhawpchhuak dawn, an retheih avangin kan hnawl ngawt dawn lo,” a ti a, “Party dangten inthlana chak zawk nih tumin pawisa cheng nuai zahnih zathum an rinchhan dawn. Keini chuan Kut fai leh thinlung thianghlim takin he inthlan hi kan hmachhawn dawn, pawisa chakna hi tihhlum kan tum a ni. Chutiang a thlen theihna tur leh ram leh hnam tana hna tha an thawh theih nan kan MLA candidate-te ti hautak lo turin ka ngen che u a ni,” a ti bawk.