MPF leh Political Party thawhhona leh Nakum inthlan atana thawhhona tur thlir a ni

Mizoram People Forum (MPF) leh Mizoram-a Political Party hrang hrang te chuan inthlan dawna Thawhhona Thuthlung an ziah chu nimin khan thlirletna neiin nakum-a inthlanpui neih tur atana MPF in rawtna an siam te pawh thlirho a ni bawk.

Mizoram People Forum (MPF) leh Political Party hrang hrang hruaitute hian nimin khan Aizawl-a Central YMA Committee Room-ah thawhhona tur thuthlung duan an thlirho a, he Inkawmhona hi MPF President Rev. Dr. Vanlalnghaka Ralte chuan kaihruaiin Political Party hrang hrang - Congress, MNF, PC, ZPM leh BJP aiawhte an tel a. He hunah hian MPF in nakum-a Assembly inthlanpui neih tur atana MPF leh Political Party te Thawhhona tur Thuthlung an duan te chu thlirho a ni a, he huna Political Party aiawha tel te chuan anmahni thu-a thu ti tlu thei an nih loh avangin an hotute hnenah an lo thlen tur thu an sawi a ni.

MPF-in thawhhona thuthlung tur a duan hi thupui pariat (8) - Inthlan, Inthlan Senso, Inthlan Campaign, Zalen taka inthlan leh Venhimna, Policy siam, Candidate chungchang, thawhhona leh tlangkawmna ti-a then a ni a. Kum 2018 inthlan atana thawhhona thuthlung lo siam tawh tam zawk chu a ngai anga rin zui tur niin Thuthlung awm sa siamrem hret engemaw zat a awm bawk a. Thawhhona thuthlung tura rawtna siam thar/tih danglamah, House to House Campaign chu Candidate te tan leh MPF tan pawh a hautak thu tarlan a ni a, dan phal baka sum hman sual theihna remchang tak a nih theih bawk thu tarlan niin, hemi vang hian House to house campaign chu neih loh ni se, Candidate ten hun leh hmun inang tlangah thu an sawi theih nan Common Platform siam a ni thung ang.

Hei bakah hian mipui vantlang tana ei leh in siam - Ruai, chawhlui kil ho, Sawhchiar pir leh a chi dangte leh Picnic te a hautak avang leh Candidate te tan ngei pawh sum tam tak sen theihna a nih thin avangin tih loh tura rawt a ni a. Party te tan Election Information Centre neih theih a ni dawn lo a, Candidate te chuan Campaign a an kal velna-a an Iptepui banna tur (Station) an siam thei bawk ang.