Serchhip-ah Zirlai naupangte tan Kala Utsav leh Rangotsav hnuiah inelna buatsaih a ni
District Level Kala Utsav leh Rangotsav intihsiakna hi Serchhip District Education Officer leh Samagra Shiksha, Serchhip District-a District Project Coordinator Lawmawma chuan nimin khan Serchhip BRC Hall-ah hawngin Kala Utsav chuan zirlaite kawng tinrenga hmasawnna thlentir chu a tum a nih thu leh, zirlaite chu an zir lai bakah kawng dangah hma sawn tir tum a nih thu a sawi a. Rampum-a ziak leh chhiar thiam tamna lamah Serchhip District chu a sang pawl ni mah se tehna hrang hranga tehin Serchhip District chu zirna kaihhnawih kawng hrang hrangah a hniam pawl kan nih thu a sawi a. Hei vang hian hmasawnna tur tam tak kan nei tih sawiin, School Education Department a thawktute pawhin hemi kawnga thawktu an ni tih hriaa theihtawp an chhuah a tul thu a sawi bawk.
Samagra Shiksha Serchhip District buatsaih District Level Kala Utsav hi High School leh Higher Secondary School-a zirlaite tana buatsaih niin Vocal Music (Traditional leh Folk), Traditional Games (Sairawkherh, Kahpup, Kalchhet inkalsiak leh Inkawibah), Dance (Traditional leh Folk), Visual art (2D leh 3D)-ah te intihsiakna neih a ni a. Rangotsav hi Middle School zirlaite inelna niin Mau hmanga thilsiam chi hrang hrang, Hnang hmanga thil siam leh tah, Thing hmanga thil siam leh remkhawm, Buara hrui leh La zai hmanga thil tah leh siam bakah 2D Painting leh 3D Sculpture-ah te intihsiakna an nei bawk a. A pumpui-ah School 10 atangin zirlai naupang 58 an tel a. BRC Hall-ah Midland M/S-ah te intihsiakna hi neih a ni. Heng Item tinah hian a titha thlanchhuah vek niin lawmman hlan an nih bakah Kala Utsav-a titha thlanchhuah te hi State Level inelna ah an tel leh dawn a ni.
Comments
Post a Comment