Architect te rawn nachang hriat kan intihhmuh zel a ngai tawh - Governor

Mizoram Governor Hari Babu Kambhampati chuan Architect te rawn nachang hriat kan intihhmuh zel a ngai tawh tih a sawi.

Mizoram Architect Forum (MAF) in ATI Auditorium, Aizawl-a Architects Meet 2022 nimin-a an buatsaih a hmanpuina ah he thu hi sawiin Governor chuan kan hmunawl neih te tangkai tak leh midangte tana hnawk lova chenna hmun leh In sakna atana hman dan chungchangah Architect te mamawhna leh pawimawhna tunhma zawng aiin a nasa tawh tih a sawi a. “Mizoram-ah chuan hmundangte angin ram zau tak tak leh hmun rem tha duh anga zau kan nei thei lova. Kan In sak dan leh hmunawl kan hnawhkhah danah te pawh kan fimkhur zual bik a ngai a. Aizawl khawpui tawt lutuk leh Mizoram-a District khawpui lian deuhah te pawh kan inhnawh tawt mek a, Architect te rawn nachang hriat kan intihhmuh zel hi a ngai tawh a ni,” a ti a ni.

Mizoram chu Lirghing thlen duh bikna hmunah pawh a ralti lai ber, Zone-V Earthquake Classification huamchhungah a awm tih kan hriat reng a ngai tih Governor chuan sawiin, “Hei bakah hian leimin awm duhna hmun leh chhiatrupna thlen thei thil dang vanga hmun him lo a ni tel a. Kan In sak dan te hian kan him leh him lohna tur kawngro a su a. Chuvangin In sak nghet tha leh him kan neih theih nan Architect rawn nachang te kan hriat a, an pawimawhna te hi kan hmuh chian a ngai a ni,” a ti. Governor chuan Architect te chu ‘Khawvel sik leh sa danglam chho zel leh khawvel tunhma aia lo lum chho zelah engtin nge a siam tha zawnga ke kan pe ve ang?’ tih lam hawia an ngaituahna te seng turin a chah a. Architect ten ruahmanna an siam hmain environment nghawng thil a ni nge ni lo tih te an ngaihtuah hmasak fo a ngai a. Mizoram-ah kawlphetha indaihlohna te pawh hrechiang a, inchung design an siam thinah te Nizung chakna hmanga kawlpetha siam (Solar Rooftop design) te uar tel turin a chah bawk.

Architects Meet 2022 hawnna inkhawm hi MAF President Ar. Lalrinzuala Ralte chuan a kaihruai a. Report a tarlan a nih danin tunah hian Mizoram-ah Architect hna thawka eizawng zingah MAF member 100 chuang an awm tawh a ni. Architects Meet 2022-ah hian Architect hna thawk mek leh architect zirlai ten India rama Architect hlawhtling pahnih - Ar. Sanjay Mohe, Mindspace Architects leh Ar. Prashant Pradhan, PP Architects te hnen atangin fuihna thu leh an hna thawh atana thil tangkai tak tak an ngaithla a, Ar. Malsawmkima Royte, Vice President chuan lawmthu sawiin huntawp a khar a ni.

Comments

Popular posts from this blog