Bangladesh Chittagong Hill Tracks atangin Mizoram-ah raltlan 274 an rawn lut tawh

Bangladesh Chittagong Hill Tracks-a Bangladesh Sipai leh Kuki-Chin National Army te inbeih avanga an sahimna zawnga Lawngtlai District-a tlanlut chu mi 274 an tling tawh a. Sawrkar hotute nen inberawnin heng raltlan te chhawmdawl hna hi thawh mek a ni.

Bangladesh Chittagong Hill Tracks-a Zo-hnahthlakte hian an himna atan leh mahni puala State nawrh chhuah tumin Kuki-Chin National Army (KNA) an din a, KNA hi Bangladesh Sawrkar-in a beih ngam loh avangin Arakan Army (AA) nen inremna siamin Bangladesh Army nen tangdunin kar hmasa Nilaini khan KNA hi Zo-hnathlak khua Chaihkhiang khua leh a chhehvelah an beihrawn a, pawisawi lo mipuite an nghaisak avangin Bangladesh-a Zo-hnahthlak harsatna tawkte hian sahimna zawngin Mizoram lam an lo pan a, heng mite hi Pathianni khan Lawngtlai District, Chawngte Sub-Division huamchhunga Simeinasora khua rawn panin Ramri-a duty Border Security Force (BSF) leh Mizoram Police ten tih tur pawimawh leh chhinchhiah ngai te an tihfel hnuah Sameisora khuaah hruai luh an ni a; nizan hmasa khan Biak In leh Primary School-ah riahtir an ni a, BSF-te hian heng raltlante hi hmun dang pan an rem tih loh vangin Sameisora-ah hian dah khawm an ni.

Thudawn danin, Bangladesh atanga Mizoram-a raltlan lo lutte hi Zohnahthlak Hnam peng hrang hrang- Bawm, Maria, Khumi, Khiang, Lushai leh Pang te niin Mizoram rawn pan hi mi 2000 chuang nia hriat a ni a, tun thlenga Mizoram-a rawn lut tawh te hi Thingdawlte atangin chhungkaw 34, Theihkhiang-a chhungkaw 2, Salopi-a chhungkaw 12, Sunsawng-a chhungkaw 5, Phainuam-a chhungkaw 1, Cheihkiang-a chhungkaw 12 leh Ruma-a chhungkaw 3, an vaiin chhungkaw 69 niin, mipa 149 leh nunau 129, an vaiin mi 274 an ni a, an ni bakah hian kawng laka la tangkhang engemaw zat la awmin anni pawh hi an rawn thlen thuai rin a ni bawk.

Raltlan lo lutte hi hmun dangah kalsawn remtih a nih loh avangin anmahni buaipuia ei tur pe turin Parva atangin mi engemaw zat an kal a, damlo te pawh an awm avangin damdawi leh eitur te an pe bawk a. Lawngtlai DC Amol Srivastava-a ruahmanna in Chawngte SDO (C)-in khawtlang hruaitute nen inberawnin an riahna tur leh ei leh in leh mamawh dangte an ngaihtuah a, dan leh thupek kengkawhtute pawhin Chawngte SDPO hovin helai hmun hi an thutchilh mek a ni.