Latest News

Sawrkar in Provisional Employees te a ngaihthah lo - Deputy Chief Minister

Deputy Chief Minister Tawnluia chuan Sawrkarin Provisional Employees te a ngaihthah lo tih sawiin, an hamthatna tur ruahmmanna hrang hrang sawrkarin a siamsak thu a sawi.

Provisional Employees Association of Mizoram (PEAM) in General Assembly vawi 1-na nimin-a Aizawl Vanapa Hall-a an neih a hmanpuina ah he thu hi sawiin Deputy Chief Minister chuan Provisional Employee te chu a lakna tur inkaihhruaina mumal tak siamin a ngheta lak te ang tho a Guidelines felfai tak dungzuia lak an ni tih sawiin, “An tlukpui a ngheta thawkte hlawh chanve pek an ni a, increment kumtin 4% pek an ni a, Casual Lave bakah Maternity leh Paternity Leave an la thei a, TA/DA an bill thei a, Medical Reimbursement siamsak niin an hlawh atanga zaa pali (4%) an bill thei,” a ti a. Regularisation Scheme siam a nih hnuah mi 900 chuang dah ngheh an nih tawh thu pawh sawiin, Provisional Employee te dinhmun leh hamthatna hrang hrang ngaihtuahtu tur Study Team chu Sawrkarin a din thu a sawi bawk.

Deputy Chief Minister chuan Provisional Employee te chu an telloin sawrkar a kal tak tak thei lo tih sawiin, anmahni zawn theuhah tha taka hna thawk turin a chah a. Hotute thuawih leh zah thiam, Office dawrtute tana dawr nuam ni turin a fuih bawk.

Provisional Employees hi Mizoram sawrkar Department 50-ah mi 8112 an awm mek a, PHE Department-ah tam berin mi 2010 an awm a, a dawttu chu Power and Electricity Department niin mi 1780 an awm a, PWD-ah mi 1100 an awm bawk a. General Secretary report atanga a lan danin sawrkar inrenchemna dan avanga Provisional Employees te Regularisation Scheme khaihlak rih phelh tura an nawrna chu kumin June 28 khan a hlawhtling a. “The Mizoram New Define Contributory Pension Scheme for Provisional Employees, 2018” chu Mizoram Sawrkar DP&AR (GSW) in a duang tawh a, Provisional Employee ten pension an neih theihna tur ruahmanna leh rawtna hi a la kal mek a ni a. Nimin-a PEAM ten General  Assembly an neih ah hian hruaitu thar thlanna an nei nghal bawk a ni.

Comments

Popular News (Last 30 Days)