Vawiin hian Serchhip-ah Mock Drill neih tum niin nimin khan Table Top Excercise neih a ni
District Disaster Management Authority-a Chairman leh District Bawrhsap Nazuk Kumar IAS kaihhruai Table Top Excercise-ah hian Bawrhsap chuan Table Top Exercise chu Mock Drill buatsaih huna mawhphurhna hrang hrang neituten an mawhphurhna te an lo hriata, thawhhona tha tak hnuaia hma an lak theih nana inhrilhhriatna hun a nih thu a sawi a. Mock Dill pawh hi chutiang bawkin, Serchhip in leilung chhiatna a tawh palha a tak taka kan chetchhuah dan tur inbuatsaihna leh lo inzir chhinna a ni tih sawiin, he huna kalkhawmte chu an mawhphurhna te tha taka hlen turin a chah bawk.
Ruahman lawk ang chuan Mock Drill hi Vawiin, Nov. 22, 2022 chawhmdar 11:00 atang hian Serchhip-ah neih a ni dawn a, he hunah hian lirnghing Magnitude 7.1-a na in Serchhip khawpui chhung a sawi anga entirna neih tur niin mi 25 thi awm ang leh mi 50 chuang hliam tuar angin chhanchhuah leh chhawmdawl hna thawh a ni dawn a. He Mock Drill-ah hian AOC Veng leh Bazar inkar SBI ATM Booth bulah leh IOC Veng-a Petrol Pump bul bakah Tuikhuah Veng-ah te kawngpui dan a nih dawn bakah sawrkar Office leh zirna In hrang hrangah te hemi nghawng te a awm ang chan tur niin heng hmuna chhanchhuah leh chhawmdawl hna hrtang hrang thawh dan tur chu a taka tihchhin a ni dawn a ni.
Nimin-a Table Top Excercise-ah hian District Medical Superintendent Dr. ZD. Lalmuanawma chuan Serchhip District Hospital Disaster Management Plan sawifiahna a nei a, Serchhip Addl. SP Saidingliana Sailo chuan Police Disaster Management Plan sawifiahna a neih bakah DM&R-a Serchhip District Organiser Vanlalduhi Ralte chuan District Incidence Response System hnuaia mawhphurhna leh a chelhtu Official te chipchiar taka sawifiahin, heng an mawhphurhna te hi Vawiin-a Mock Drill-ah a takin an thawk chhin dawn a. He hun hi 1st Bn. NDRF te pawhin an rawn telpui dawn a ni.
Comments
Post a Comment