Union Minister of State for Minority Affairs hovin Sawrkar hmalakna thlirhona neih a ni

Union Minister of State for Minority Affairs John Barla chuan nimin khan Lawngtlai tlawhin, hmasawnna hna thawh mek leh hmunhma pawimawh thenkhat a tlawh bakah Lawngtlai-a Sawrkar Laipui ruahmanna hnuaia hmasawnna hna thawh hrang hrang thlir hovin Head of Office-te thutkhawm a neihpui.

Mizoram-a rawn zin mek Union Minister of State for Minority Affairs John Barla hian nimin khan Lawngtlai hi thlengin Lawngtlai-a State sawrkar leh Lai Autonomous District Council (LADC) hnuaia Official-te nena Lawngtlai DC Conference Hall-a thutkhawm an nei a, he hunah hian Lawngtlai Bawrhsap Amol Srivastava IAS chuan Lawngtlai District dinhmun tlangpui leh District chhunga sawrkar hmalakna langsar zualte a tarlang a. Union Minister of State ho hian Official te chuan Sawrkar Laipui ruahmanna hnuaia hmalakna hrang hrangte an sawiho a ni. 

He hunah hian John Barla chuan Sawrkar Laipuiin Minority-te hmasawnna tur a ngaih pawimawh thu leh an tana ruahmanna hrang hrang a duan thu sawiin, Official kalkhawmte chu khua leh tui te'n sawrkar ruahmanna an hriat a, a taka an chhawr theih nana hriattir leh anmahni tanpui kawngah theihtawp chhuah turin a chah a ni.

Hemi hma chawhma lam khan Lairam Isua Krista Baptist Kohhran (LIKBK) Centre Church, Lawngtlai Bazar Veng-ah Union Minister hi inkhawmin inkhawm banah Kohhran hruaitute nen inkawmhona hun an hmang a, India ramah Kristiante chu Minority kan nih thu sawiin, ram hmasawnna kawngah erawh Kristian te leh Kohhran in a thawh hlawk hle tih a sawi a. Kohhran kaltlanga ram leh khawtlang tana rawngbawlna chu a ngaihhlut thu sawiin, Kohhran hruaitute'n sikul leh damdawi In kaltlanga an rawngbawlnaa mamawh an neih an thlen te tih hlawhtlin sak a tum thu a sawi bawk.

Union Minister hian LIKBK enkawl damdawi In leh PMJVK sum hmanga Residential Sports School sak bakah KMMTTP kawng laih mek te chu a tlawh bawk a ni.

Comments

Popular posts from this blog