Minister in Mizoram Science Congress hmanpui

Mizoram Science Congress 2022 chu nimin khan Mizoram Legislative Assembly Annexe Conference Hall-ah neih niin I&PR Minister Lalruatkima chuan khuallian nia hmanpuiin hemi puala Science Exhibition neih pawh a hmanpui bawk.

Mizoram-a Science lama mithiamte leh Science chungchanga intawhkhawmna lian ber, Mizoram Science Congress 2022 hawnna ah hian I&PR Minister chuan Science lam thiamna in kawng tinrengin mihring nitin nunah awlsamna leh remchana nasa taka siamsakin mihring nun a kaihruai nasat thu sawiin, Science thiamna avanga thil hmuhchhuah leh siamchhuah hian bu a khuar thuk hle tawh a ni, a ti a. Kumin-a Mizoram Science Congress thupui ‘Science & Technology for Sustainable Ecosystem’ tih in a tum ber chu Science leh a thiamna hmanga hmanrua ten, mihring te leh a chenpuite tan, tun hun leh hun lo kal zel tur chenfakawm taka siam a nih thu sawi bawk.

He hun hi Human Resources Development Board Vice Chairman L. Thangmawia pawhin hmanpuiin Mizoram-a Science zirtirna bultanna a la rei loh dan ngaihtuahin hmasawnna kan nei chak hle nia a hriat thu a sawi a. Mithiam chhuanawm tak tak Science discipline hrang hrangah ram pum huap ang pawha hming lang kan nei belh zel chu lawmawm a tih thu sawiin, he hunah Researchers kalkhawmte chu an zirbingna Mizoram mamawh zawnga an kalpui a tul thu a sawi bawk.

Mizoram Science Congress hi kum 2016 atanga khan neih niin kum hnih (2) dana zel buatsaih thin a ni a. Kumin a Congress thupui atan 'Science & Technology for Sustainable Development' tih chu thlan niin Exhibition hi 'Science and Technology for Management of Water Resources' tih thupui hmangin Aizawl City Park-ah buatsaih a ni a. Hetah hian Science nena inkhaihhnawih Department thenkhatte, mimal innovator khawl siamchhuahte leh zirlai naupang ten exhibit an phochhuak a ni.

Mizoram Science Congress-ah hian State chung leh State pawn atangin Science discipline hrang hrang Scientist leh mithiam 130 chuangin Oral leh Poster presentation an nei dawn a. Aijal Club-ah Technical Session pali kaltlangin presentation te hi buatsaih a ni dawn a, heng ah hian India rama Institution hmingthang - National Geophysical Institute, Indian Council of Medical Research, IIT Guwahati leh Barkhatullah University atanga lo kal mithiam ten thuhmaruai sawiin hun an hmang dawn bawk a ni. Mizoram Science Congress hi a thawhkhat nan October ni 21, 2022 khan Mizoram Children Science Congress buatsaih niin hetah zirlai titha 10 te chu nakum-a neih tur National Science Congress-ah an tel dawn a ni.

Comments

Popular posts from this blog