All India Cooperative Week kharna nei

All India Cooperative Week 2022 kharna chu nimin khan Cooperation Minister C. Lalrinsanga hovin Lunglei-a Art & Culture Conference Hall-ah neih a ni.

Tun thla ni 14 atanga Nov. 21 thleng awh All India Cooperative Week 2022 kharna hunah hian Cooperation Minister C.Lalrinsanga chuan Cooperative te kaltlanga hmalakna hrang hrangte chuan kan ram economy a bulthut atanga a nghawng avangin hmasawnna daih rei leh mipuite tana chhenfakawm thlen thei tu a ni tiin, hemi kawnga thawktute chu Cooperative Movement tan theihtawp chhuah chhunzawm zel turin a ngen a. All India Cooperative Week chu India ram Prime Minister hmasa ber Pandit Jawaharlal Nehru piancham hriatrenga atana kumtin hman thin anih thu sawiin, Mizoram-ah pawh Cooperative Movement chak taka kalpui zel turin hmalak chhoh mek a ni a, mi harsa zawk ten In leh lo an neih theihna turin Cooperative kaltlanga hmalakna Housing Federation te pawh kalpui leh tura hmalak mek anih thu a sawi bawk.

Kumin-a All India Cooperative Week hi a vawi 69-na niin thupui atan ‘India @75: Growth of Cooperatives and Future Ahead’ tih chu hman niin nimin-a Lunglei District Cooperative Union Ltd (LDCU) buatsaiha he Hapta kharna hunah hian chawhnu lamah mithiam hrang hrang ten Paper an buatsaih chu zirho a ni bawk a. Lunglei District Cooperative Union Ltd. (LDCU) President leh Vice President lo ni tawh te hnenah chawimawina hlan ni bawkin Cooperative Society hrang hrang aiawhte an tel a ni.