Hmeichhia te hamthatna turin theihtawp chhuah

Rural Development Department changtu Minister Lalruatkima chuan Mizoram sawrkar in hmeichhia te hamthatna tura theihtawp a chhuah thu a sawi.

Mizoram State Rural Livelihoods Mission (MzSRLM) buatsaih State Level Community Led Campaign Against Gender Discrimination hawnna Inrinni kaltaa Mizoram Rural Bank Conference Hall, Aizawl-a neih ah RD Minister Lalruatkima chuan India sawrkarin hmeichhiate dinhmun a ngaipawimawh em em a, chutiang bawkin Mizoram sawrkar pawhin hmeichhia te hamthatna tura theihtawp a chhuah thu a sawi a. Mizoram chu India state dang te ngaihtuahin mipa leh hmeichhia inthliarhranna awm lohna tura kan tihthat thu sawiin, sawrkar Office te, Competitive Exam-ah te leh Politics ah te hmeichhiaten dinhmun pawimawh tak tak an luah thu a sawi a. Khawtlang, kohhran, tlawm-ngai pawl te leh Department hrang hrang te chu hmeichhiate thliarhranna tihbo a nih theih nan an thawhho a pawimawh thu pawh sawiin, inhrilhhriatna neih zel a pawimawh thu a sawi a, MZSRLM chu theihtawpin hmeichhiate laka hleilenna umbona kawngah hma la chhunzawm zel turin a fuih bawk a ni.

State Level Community Led Campaign Against Gender Discrimination hi Ministry of Rural Development hnuaia DAY-NRLM thuchhuak angin India ram pumah November ni 25 atanga December ni 23, 2022 chhung hian hman tura ruahman a ni a, Mizoram-ah pawh MzSRLM awmna District hrang hrang ah hman a ni dawn a ni. He Campaign neih chhung hian Self Help Group member te hnenah hmeichhiate chunga hleilenna leh mipa leh hmeichhe inthliarna awm lo tura hmalakna chungchang zau zawka inzirtirna kalpui tur a ni.