Nakum inthlan hmain Bru te paih fel hman beisei

Tripura Transit Camp-a Bru te chu nakum 2023-a Mizoram Assembly inthlanpui neih hma ngeiin Mizoram Electoral Roll atanga paih fel hman tum a ni.

Mizoram Election Department-a Jt. Chief Electoral Officer (CEO) David Liansanglura Pachuau sawi danin Mizoram Electoral Roll-a chuang Bru mi leh sa, Tripura Transit Camp a cheng te zinga mi 2006 te chu Mizoram Electoral atangin paih an ni tawh a, heng mi te hi Mizoram chhunga District 3 atanga paih niin Mamit District-ah paih an tam ber a, Kolasib District in a dawt a. Mamit District atang hian Hachhek bial-ah 1,125, Mamit bial-ah 396 leh Dampa bial-ah mi 127, an vaiin 1,648 paih an ni tawh a. Kolasib District atangin Tuirial Bial-ah 83, Kolasib bial-ah 34 leh Serlui bial-ah mi 70, an vaiin mi 187 paih an ni tawh bawk a. Lunglei District-ah West Tuipui bial atangin 117, Thorang bial-ah mi 53 leh Lunglei South bial-ah mi pakhat, an vaiin mi 171 paih an ni tawh bawk a. Mizoram Election Department chhinchhiah danin Bru mi leh sa Mizoram chhunga vote nei te hi an vaiin 11,759 an ni.

Mizoram Election Department-a Jt. Chief Electoral Officer (CEO) David Liansanglura Pachuau chuan Draft Roll buaipui a nih avanga Mizoram Electoral Roll atanga Bru raltlan, Tripura-a inbengbel te paih (deletion) hna chawlhsan lailawk a nih hnuah Draft Roll tihchhuah fel a nih tak avangin deletion request pawh an dawng leh zel tawh turah an ngai tih a sawi a, Transit Camp-a awm Bru te chu nakum Mizoram inthlanpui hma ngei a paihfel hman beisei a ni tih sawiin, Tripura pawh nakum kumtir lama inthlang tur an nih ve avangin an hmanhmawh ve tho a a rin thu a sawi bawk.